Read lango Jabuli 22 Bible Online

Jabuli 22 - lango bible

Jabuli 22

¹Baŋ adwoŋ wer; Man wer a Daudi ame owero kun olubo kite ame owero kede ibai. Obaŋana, Obaŋana iweka piŋo? Piŋo kara itye kannabor abora keda ame mom iromo lara, mom itye ka winyo cura bo?

²Ama Obaŋana, akok dyeceŋ cite mom igamo doga, akok dyewor daŋ, cite mom anwoŋo kare moro me weo.

³Aco kono yin Obaŋa ame cil, i bedo i wi kom loc ame jo Icrael paki apaka.

⁴Kwariwa rik geni, gin ogeni, yin ite larogi.

⁵Gin rik ocwao kwacgi baŋi, omio ote larre, gin rik ogeni, omio mom obedo icwercunnyoro.

⁶Cite an kom arom aroma i kudi ata, mom dano, ame jo ŋalo kun ocao acaa.

⁷Jo luŋ ame nena, yeta ayeta, ocima i lebgi, dok oyeŋo wigi i koma kun okobo ni,

⁸“En geŋo Obaŋa, wek Obaŋa lare, Rwot myero lare, pien Rwot pwoc.”

⁹Aco kono yin en a rik imio onywala yin en a daŋ igwoka i kor totta ame pwod adot.

¹⁰An abedo jeŋere i komi cakere ameonywala, cakere i kare ame onywala yin en ibedo Obaŋana.

¹¹Kur ibed bor keda, pien can ceggi acega, aco kono mom tye ŋattoro aromo konya.

¹²Okwor doŋ ogura oko dyere calo twoni ager, ogura doŋ oko atek calo twoni atek me Bacan;

¹³otye ka ŋamo doggi alac i koma, calo eŋatu ager ame tye ka koko,

¹⁴An doŋ acalo pii ame oonyo oko piny, cogo koma doŋ ogwegweta oko i kabedo ducu; cunya doŋ omeye oko calo odok kic, amontenna doŋ ojebere oko;

¹⁵Tekona otwo doŋ calo tako gulu, leba daŋ doŋ omoko oko i dano abuto doŋ piny iyi apua calo dano oto.

¹⁶Nen jo doŋ ogura dyere calo gwogi, otim tim areco apipim doŋ ogura dyere; ocobo ciŋa kede tyena.

¹⁷Atwero kwano cogo me koma luŋ, ociko waŋgi i koma kun onena i keo meicel;

¹⁸Opoko boŋŋina i akinagi, obolo kwir pi boŋŋina.

¹⁹Cite yin myero kur ibed abor keda, Ama Rwot, yin en ikonya, ru lara ba!

²⁰Lar tipona i pala romo, lar kwona i teko a gwogi.

²¹Lara i dog eŋatu, kede tipona i kom tuŋ twoni ager,

²²Abino dworo nyiŋi baŋ omegona, abino paki i akina lwak ocokere.

²³Wun jo luŋ ame woro Rwot, pake wunu, wun jo a Yakobo luŋ, ket wunu kwogo i kome, wun jo Icrael ducu, lwore wunu.

²⁴Pien en mom ocaowu, mom okwero can a jo a can opoto i komgi, en mom orwenyo oko i baŋgi, en winyo kokogi ka okok baŋe.

²⁵Abino paki i akina lwak ocokere karacel, abino cobo gin ame aciko i nyim jo ame wore,

²⁶Jo a can opoto i komgi bino cem te yeŋ atek, jo ame yenyo Rwot bino pako Rwot,

²⁷Myero ibed giri kwo aber nakanaka, Jo me wi podo luŋ bino po pi Rwot, ote lokere bino baŋe; doggola me rok apapat, gin luŋ obino wore.

²⁸Pien loc obedo me Obaŋa, en loo tok luŋ aluŋa.

²⁹Jo a wakere luŋ me wi podo bino ryebere i nyime, jo ame to te dok iyi apua daŋ bino ryebere i nyime,

³⁰Lwagi jo me kare luŋ bino tic baŋe, jo bino rabo pi Rwot baŋ lwagi jo ame lubogi,

³¹kun otito pi larrere baŋ jo ame mom ru onywalogi, ni Rwot laro jo mere.