Read lango Jabuli 25 Bible Online

Jabuli 25 - lango bible

Jabuli 25

¹Man wer a Daudi. Atiŋo kwona amio baŋi, Am Rwot,

²An gira ageni, Ama Obaŋana, kur imi lewic maka, kur imi okworra bed ŋala.

³Ama Rwot, kur imi lewic mak jo ame kuri, ento mi lewic mak jo ame kweri nononono.

⁴Rwot, mia aŋe yoni, pwonya kop i kom yoni ducu.

⁵Tela me lubo ateni, kun ipwonya, pien yin Obaŋa ame lara, ageni nino ducu.

⁶Pien kicani, Ama Rwot, po pi marri a mom lokere, ame ibedo bedo kede cakere con.

⁷Kur dok ipo pi bal ame atimo i kare me tinona, kur daŋ ipo pi rocca luŋ, po pira pi marri a mom lokere, pi berri giri, Ama Rwot.

⁸Rwot ber, dok cunye ler, mannono omio en pwonyo obalo me ŋeyo yo,

⁹En telo jo ame mwol i gin atira, kun pwonyogi me ŋeyo yo mere.

¹⁰Mar a mom lokere kede gen, dwoŋ meicel i yo a Rwot luŋ, pi jo ame lubo cikere mere, karacel kede koppere me caden.

¹¹Pi ber a nyiŋi, Ama Rwot, wek balle oko pien dwoŋ meicel.

¹²Dano ame lworo Rwot, Obaŋa bino pwonye me ŋeyo yo a myero elub,

¹³En ikome bino bedo i lonyo kare luŋ, dok itino mere bino leyo lobo.

¹⁴Rwot mako dyere i jo ame wore, en miogi oŋeo cikere mere,

¹⁵Aciko waŋa kare luŋ i kom Rwot, pien en a gonyo tyena ka omoko i bwo.

¹⁶Lokere idwog baŋa me inyutta berri pien atye doŋ kena kun can orida oko.

¹⁷Kwany cwercuny luŋ ame tye i cunya, dok ilara i peko luŋ ame atye kede.

¹⁸Tam pi can kede peko ame atye kede, me ite weko balla luŋ,

¹⁹Tam pi wel okwor ame atye kede, dok inen kite ame gin daga kede agwa meicel.

²⁰Gwok kwona, dok ilara, Ama Rwot; kur imi ket lewic i koma, pien an gira ariŋo alaro baŋi.

²¹Myero ler a cunya kede cunya ame tye atira gwoka, pien an gira ageni.

²²Lakoro jo Icrael, Ama Rwot, i kom peko luŋ ame gin otye kede.