Read lango Jabuli 26 Bible Online

Jabuli 26 - lango bible

Jabuli 26

¹Man wer a Daudi. Ŋol koppa, Ama Rwot, pien abedo timo gin a tye atira, abedo geno Obaŋa kare luŋ, kun mom agatte kadi acel.

²Ŋia aber odoco, dok itema, tem cunya kede tamma luŋ.

³Pien a tye ka neno mar a mom lokere ame i tye kede, dok a tye ka timo ginnoro luŋ i gen adwoŋ.

⁴Mom anywako kabedo i jo ogoba, mom daŋ anotte obwol jo.

⁵Adag ribere otim tim areco, dok mom daŋ abino nywako kabedo i jo a kitegi reco.

⁶Alogo gira ciŋa oko me nyuto ni a mom i balloro, me awot aman keno lammi, Ama Rwot,

⁷kun awero wer me pwoyi i dwon aloŋo, dok atito pi ticcoro luŋ me awura ame yin itio,

⁸Ama Rwot, an amaro bedo i odi, kede kabedo ame kwogoni bedo iye.

⁹Kur imia arweny oko karacel obalo, kur imi kwona orweny oko i jo ame onyo remo a jo,

¹⁰jo ame ciŋgi mom keŋ timo gin arac, ame caogi opoŋ i lim ame owilogi kede i muŋ,

¹¹Cite an gira, cunya cil i kare luŋ, lakoro an, dok kica myero maki i koma,

¹²Tyena ocuŋ kanopirre apira, abino pako Rwot naka i dye lwak ocokere luŋ.