Read lango Jabuli 27 Bible Online

Jabuli 27 - lango bible

Jabuli 27

¹Man wer a Daudi. Obaŋa en obedo tarana, dok en a daŋ lara; kara doŋ ŋa ame abino lworo? Rwot en obedo kan atek me gwoko kwona; kara doŋ ŋa ame myero alwor?

²Ka ce jo areco mito lweny i koma me neka, kun okobo kop arac i koma, okworra kede omonena, obino gatte ote rette oko piny.

³Kadi mony luŋ gura dyere, mom abino bedo i lworo moro i cunya; kadi bed ocak lweny i koma, pwod gire abino bedo kede gen pi Rwot.

⁴Tye gin acel keken ame akwao i baŋ Rwot, mannono keken en ame amito; amito ni abed gira i ot a Rwot, pi kare luŋ me kwona, me abed neno ber a Rwot, dok abed penye i ode kuno me tela.

⁵Pien i kare me peko, en bino kanai ode, en bino wuma oko i kema mere, bino ciba malo i wi kidi.

⁶Mannono bino miyo abedo gira malo, i wi okworra ame ogura dyere; abino yalo Rwot i mot i kema mere, kun aredo i yomcuny meicel. Abino wero wer kun apako Rwot i dwon amit.

⁷Winy kokona, Ama Rwot, ka akok baŋi, kica myero maki i koma, me igam doga.

⁸Yin ikobo ni, “Bin baŋa.” Agamo i cunya ni, “Abino bino baŋi, Ama Rwot.”

⁹Kur iponna oko, Ama Rwot. Kur iryema an amironi kede akemo, yin ame yam ibedo konya. Kur ibola oko ba, kur iweka ata, Ama Obaŋana ame lara.

¹⁰Pien pappa kede totta oweka oko ata, cite Rwot gire bino gwoka.

¹¹Pwonya me aŋe yoni, Ama Rwot; tela i yo ame tur kede popony mom iye, kur iweka i ciŋ okworra,

¹²Kur ijala i ciŋ omonena; pien ocaden ame ogoba tye ka ŋuno goba i koma, kop doŋ adonnyo i doggi agwa meicel.

¹³An pwod aye ni abino neno ber a Rwot, i lobo a jo akwo,

¹⁴Kur Rwot; cuŋ atek kun cunyi nwaŋ, myero ikur Rwot.