Read lango Jabuli 28 Bible Online

Jabuli 28 - lango bible

Jabuli 28

¹Man wer a Daudi. An acwao kwacca baŋi, Ama Rwot, yin ibedo kidina atek ame gwoka, kur icul yiti oko, Ama Rwot, pien ka yin iliŋ aliŋa, abedo arom aroma i jo ame oyiko i bur.

²Winy kwacca ame abako kede doga baŋi, ka akoko kony i baŋi, kun ataŋo ciŋa malo i nyimi, kun nyima oneno kabedoni acil meicel.

³Kur itera karacel i jo akitegi reco, ame gin obedo jo ame timo tim areco, ame kobo pi kela kuc baŋ owotegi, kun cunygi col meicel.

⁴Culgi ame rom aroma i ticgi, dok ame rom aroma i tim arac ame gin timo, culgi a rom aroma i tic ame ciŋgi otio, culgi i cul ame oporre pirgi.

⁵Pien gin mom oparo pi tic a Rwot otio, onyo pi gin ame en oketo, mannono omio en bino turogi oko, mom dok ote ya malo atwal.

⁶Rwot myero pwo, pien en owinyo dwona, ame abako i doga baŋe.

⁷Rwot en tekona kede kwot me geŋo koma, an gira agene; omio en konya, cunya te bedo ayom meicel, an apwoe kede wer me pake.

⁸Rwot en obedo teko a jo mere, dano mere ame owiro kede moo laro baŋe.

⁹Lar lwakki, Ama Rwot, dok imigi gum, tim ber ibed akwatgi dok igwokgi nakanaka.