Read lango Jabuli 30 Bible Online

Jabuli 30 - lango bible

Jabuli 30

¹Man wer a Daudi. Wer man owero i kare me kwero ot woro Obaŋa. Apak i gira, Ama Rwot pien ikonya, dok mom imio okworra olelo i koma,

²Ama Rwot Obaŋana, rik akok baŋi me ikonya, nen doŋ ityeko miya acaŋ oko.

³Nen yin ikwanyo tipona i Ceol twal, imia dok akwo i akina jo ame doŋ odonyo piny i lyel.

⁴Wer wunu wer me pako Rwot, wun jo mere acil, pwoc wunu pi nyiŋe acil.

⁵Pien akemo mere mom ri nakanaka, cite berrere bedo pi kare me kwowa luŋ, Ka ce abedo i cwercuny dyewor, odiko nwoŋo atye alelo alela.

⁶Man omio an i kare ame atye aber meicel akobo ni, “Ginnoro gire mom bino corra teŋe.”

⁷Pi berri, Ama Rwot, imia acuŋ atek calo twon kidi atek: i kare ame ipono oko i nyima, cunya opoto.

⁸An gira rik akok baŋi, Ama Rwot, dok abako doga baŋi kun akwai ni,

⁹“Kara tona twero miyi kony aŋo, ka ce an doŋ adonyo oko piny i lyel? Apua me lobo bino paki bo? dok bino rabo pi kiteni atira.

¹⁰Ama Rwot, winy kokona, kica omaki i koma, Ama Rwot, yin myero ibed ŋat ame konya.”

¹¹Iloko kumona odoko lelo, imia agonyo boŋo cola oko i koma, ite lunyo ruka kede yomcuny.

¹²Me tipona bed paki kun mom liŋ, Ama Rwot Obaŋana, abino pwoyi nakanaka.