Read lango Jabuli 31 Bible Online

Jabuli 31 - lango bible

Jabuli 31

¹An alaro baŋi, Ama Rwot, kur imi lewic maka; lara pi kiteni atira.

²Cik yiti iwiny koppa, Ama Rwot, ru lara oyot meicel. Bed kidi atek me larrena, cel atek me lara.

³Yin en ibedo kidina kede cel atek me gwoka, Ama Rwot, tela dok igwoka pi nyiŋi.

⁴Gonya iyi boo ame ociko kan adiŋ pira, pien yin ibedo ka larrena.

⁵Amio kwona i ciŋi, Ama Rwot, yin gire ilakoro an, Ama Rwot Obaŋa ame genne.

⁶Yin idag jo ame woro cal jogi a konygi mom, an gira ageni, Ama Rwot.

⁷Abino lelo kun cunya yom pi marri a mom lokere, pien yin ineno can ame atye kede, dok iŋeo pekona.

⁸Dok mom imia i ciŋ okworra, imia kabedo alac me bedona.

⁹Kica myero omaki i koma, Ama Rwot, pien atye i can, koko daŋ omio waŋa ocido oko, tipona kede koma doŋ oballe oko.

¹⁰Pien abedo bedo i cwercuny kare luŋ me kwona, kun mwaka i mwaka atye ka cur acura. Tekona otum oko pi peko ame abedo beo iye, cogona luŋ daŋ onyoŋere oko,

¹¹Jo ame daga doŋ bedo ŋala aŋala, owotena-gu nyera anyera, jo ame ŋea doŋ lwora alwora, jo ame nena i dye yo riŋo gigi oko.

¹²An doŋ arom aroma i dano oto, wi jo doŋ owil i koma oko, calo tako gulu ame obolo i wi odur.

¹³Nen atye ka winyo jo tye amuŋo i nyiŋa, lworo doŋ ogurra oko dyere. Oyubere doŋ oko pira, otye ka poro kop me neka.

¹⁴Cite an gira ageni, Ama Rwot, akobo ni, “Yin en ibedo Obaŋana.”

¹⁵Kare me kwona gire tye i te twerri, lara i ciŋ okworra kede i ciŋ jo ame wuna.

¹⁶Nen amironi i waŋ me kica, Ama Rwot, lara pi marri a mom lokere,

¹⁷Kur imi lewic maka, Ama Rwot, pien an gira akok baŋi, mi lewic mak otim tim areco, migi oto owot i Ceol liliŋ.

¹⁸Mi leb jo akobo kop goba to oko, ame kobo kop areco me acae, kun owakere kede i kom jo a kitegi atira.

¹⁹Ber ame ikano pi jo ame lwori dwoŋ nadi, gin ame itimo me awura pi jo ame riŋo laro baŋi dwoŋ nadi i nyim jo luŋ.

²⁰Yin igwokogi i kabedo i nyim, kan ame itye iye, ilarogi i ciŋ jo ame tye ka poro kop i komgi, igwokogi aber i odi, i kom leb abit ame jo yelogi kede.

²¹Rwot myero pwo, pien onyuto marrere a mom lokere baŋa i yore me awura, i kare ame rik ogura dyere calo boma ame oguro.

²²I twon lworo adwoŋ a rik atye kede ate kobo ni, “Oryema doŋ teŋe meicel nyimi.” Cite yin rik iwinyo kwacca ame abako kede doga baŋi, i kare ame akok baŋi me konya.

²³Wun jo ame geno Rwot, mar wunu Rwot, Rwot gwoko jo ame genne, cite jo ame opala, en culogi can oromogi odoco,

²⁴Cuŋ wunu atek kun cunywu nwaŋ, wun jo luŋ ame geŋo Rwot.