Read lango Jabuli 32 Bible Online

Jabuli 32 - lango bible

Jabuli 32

¹Man wer a Daudi. Tye kede winyo, jo a doŋ otimogi kica i kom timgi areco, ame owumo balgi oko.

²Tye kede winyo, dano ame Rwot mom okwano balloro i kome, dok ame goba moro mom i cunye,

³Ka ce akwero tuco balle, koma balla oko, kadi bed acur ceŋ iyul.

⁴Pien iketo can i koma dyeceŋ kede dyewor, tekona te tum oko odoco, kite ame ikuna rwenyo kede i oro,

⁵Aye doŋ tuco balla i nyimi, ginnoro luŋ arac ame atimo mom amuŋŋi. An rik akobo ni, “Abino tuco balla baŋ Rwot, yin ite tima kica i kom balla.”

⁶Pi mannono, jo luŋ ame woro Obaŋa, myero gin luŋ ocwa kwacgi baŋi, i kare ame gin tye kede can, ame alele kot atek mito mwonyogi oko, pi mannono mom bino tuno i komgi,

⁷Yin en ibedo ka ponona, yin en igwoka ka peko tye, igurra oko dyere kun ilara.

⁸Abino pwonyi kun anyutti yo me aluba, abino miyi ryeko, dok waŋa mom bino rwenyo i komi.

⁹Kur ibed calo aguragura onyo kana a mom ŋeo ginnoro, ame myero twe doge kede wie, me lub gin ame imito.

¹⁰Jo areco rwatte kede peko adwoŋ meicel, cite jo a geŋo Rwot en gwokogi kede marrere a mom lokere,

¹¹Myero ilel wunu kun cunywu yom i Rwot, wun jo a kitewu atira; red wunu pi yomcuny ame itye wunu kede, wun jo luŋ ame cunywu atira.