Read lango Jabuli 33 Bible Online

Jabuli 33 - lango bible

Jabuli 33

¹Lel wunu i Rwot, wun jo a kitewu atira! Pake wunu, wun jo ame winyo koppere!

²Pak wunu Rwot i naŋa opuk, wer wunu wer me pake i naŋa a tollere tye apar twal.

³Pake wunu i wer anyen, go wunu naŋa me pake i diro meicel, kun iwero wunu i dwon aloŋo.

⁴Pien kop a Rwot okobo tye kakare, dok en agen meicel i ticcere luŋ,

⁵Rwot maro kite atira kede ŋolo kop atira, mar a Rwot a mom lokere tye adwoŋ meicel i lobo,

⁶Kop a Rwot en omio lobo okette, jami iye luŋ weo mere en omio obedo tye.

⁷En ocoko pii i nam luŋ karacel bala pii i yi cupa, okano nam atut oko calo gin okemo ot kano jami.

⁸Jo me wi lobo luŋ myero wor Rwot, myero jo luŋ ame bedo i wi podo bed i lworo i nyime.

⁹Pien en okobo ka kop, lobo te kette, en ociko acika keken, jami luŋ te bedo tye.

¹⁰Rwot balo yik a rok apapat oko, en mio tam a jo ocele mom cobere,

¹¹Cite gin ame Rwot oyiko perakino waŋ i waŋ, gin ame en otimo i ciŋe bedo me kare luŋ,

¹²Rok ame Obaŋa en a Rwotgi, tye i winyo, jo ame en oyero me bedo jo mere ikome.

¹³Rwot neno piny i polo, en neno jo luŋ aluŋa,

¹⁴En noloro piny i wi kom me loccere, neno jo luŋ ame bedo i wi lobo.

¹⁵Rwot gire en ame oketo cuny jo luŋ, en neno ginnoro luŋ ame gin tio.

¹⁶Abaka mom larre pi lwak mony ame en tye kede, acirikale mom larre pi twon teko mere adwoŋ.

¹⁷Aguragura me lweny mom obedo gi-agena i lweny, mom romo laro dano kadi acel, pi twon teko mere adwoŋ wok-ki.

¹⁸Nen ba, wan Rwot gire mom rwenyo i kom jo ame wore, jo ame tye kede gen pi marrere a mom lokere,

¹⁹me elar tipogi oko i to, dok egwokgi obed kwo i kare me kec.

²⁰Tipowa tye ka kuro Rwot, en obedo akonywa kede kwot me geŋo komwa.

²¹Wan giwa, cunywa yom pire, pien wan otye i gen i kom nyiŋe acil.

²²Ama Rwot, mi marri a mom lokere bed i komwa, pien wan otye kede gen piri yin keken.