Read lango Jabuli 35 Bible Online

Jabuli 35 - lango bible

Jabuli 35

¹Man wer a Daudi. Ama Rwot, pid kede jo ame pida, dok ilweny kede jo ame lwenyo keda,

²Mak kwot adwoŋŋere kede ginnoro me geŋo komi; me iya malo ikonya.

³Wot koŋ doŋ toŋŋi oko, me lweny i kom jo ame ryemo yora, kobbi cunya ni, “An en alari.”

⁴Mi lewic mak jo ame mito neka, mi jo ame poro kop arac i koma, olokere odok cen i twon lewic adwoŋ meicel.

⁵Migi obed calo cuŋ kal ame yamo kolo, i kare ame omalaika a Rwot tye aryemogi.

⁶Mi yogi acol icuc dok apwot apwota, kare ame omalaika a Rwot aryemogi.

⁷Ociko boogi kan adiŋ pira aboŋo balloro ame onwoŋo i koma, okunyo-gu bur me tyeko kwona nononono.

⁸Mi can tugi atua, kun mom oŋeo kadi acel, migi omok i boogi ame ociko kan adiŋ pira, migi orette oto okoi bur ame okunyo pira,

⁹Cunya te bedo ayom meicel i Rwot, abino lelo meicel pi lara ame en olara kede.

¹⁰Cogo koma luŋ bino kobo ni, “Ama Rwot, ŋa kara ame cal kedi? Yin ame ilaro jo agoro, i ciŋ dano ame tek loc atek ateka, ilaro ŋat agoro kede ŋat ame piny oloo, i ciŋ jo ame yako jamigi.”

¹¹Ocadennogo me goba ya malo, ote bedo pepenyo an i gin ame an akwia.

¹²Ocula i rac pi gin aber ame an atimo; cunya cwer atek meicel.

¹³Cite an i kare ame komgi lit, abedo ruko boŋo cola, dok abedo minne i kec pirgi. Abedo kwayo Obaŋa kun akula wia piny,

¹⁴calo ŋat ame akumo pi awottere onyo ominnere, dok abedo wot atata calo ŋat a koko tottere, kun akumo ame akulo wia piny.

¹⁵Ento gin ka onena, ogatte, gin ocokere me nyera, ocokere karacel me lweny i koma, naka oŋwalo a yam mom aŋeo, obedo yeta kun mom oliŋ kadi acel.

¹⁶Gin luŋ omedde nywara anywara kun daŋ ocaa, ame okao lakgi atek odoco.

¹⁷Ama Rwot, kara ibino bedo nena anena naka awene ba? Lara oko i ciŋgi ba, lar kwona i ciŋ eŋatu.

¹⁸Mannono bino miyo apwoi i akina lwak jo ocokere karacel, abino paki i akina lwak adwoŋ.

¹⁹Kur imi okworra bed lelo i koma, kun gin obedo otim tim areco, kur imi jo ame daga aboŋo ginnoro ame atimo, bed mimio waŋgi ikoma atata.

²⁰Pien gin mom okobo kopporo me kuc, ento gin obedo kobo kop me lweny i kom jo a bedo mot i wi lobo, gin obedo paro kop me bwolo jo keken,

²¹Oŋamo doggi alac me kobo kop i koma, kun okobo ni, “Aa! Aa! Wan doŋ otyeko neno kede waŋwa.”

²²Ama Rwot, yin doŋ ityeko neno, kur ibed liŋ aliŋa! Ama Rwot, kur ibed bor keda.

²³Ya malo, me ibin ikonya, Ama Obaŋana kede rwotta, cuŋ pira,

²⁴Kwany kop oko i wia, Ama Rwot Obaŋana, kite acalo yin kiteni atira, me kur imigi olel i wia.

²⁵Kur imigi obed kobo i akinagi kengi kengi ni, “Aa! Doŋ onwoŋo gin ame cunywa mito.” Kur imigi obed kobo ni, “Wan doŋ otyeko mwonye oko,”

²⁶Mi lewic mak jo ame nyero canna, babaŋogi oko, Ama Rwot. Mi ale twodgi ducu, gin jo luŋ ame wakere i koma,

²⁷Mi jo ame mito ni an alo kop bed i yomcuny, kun okobo kare ducu ni, “Rwot gire dwoŋ meicel, cunye bedo yom ka omiro mere tye i kuc.”

²⁸Abino rabo pi kiteni atir, dok abino pako nyiŋ i dyeceŋ luŋ.