Read lango Jabuli 37 Bible Online

Jabuli 37 - lango bible

Jabuli 37

¹Man wer a Daudi. Cunyi kur bed cwer pi jo a kitegi reco, nyeko moro kur maki, i kom otim tim areco.

²Pien gin bino two oko calo lum, obino ner calo pot yen.

³Gen Rwot dok iti tic aber, mannono bino miyo ibedo i lobo i kuc.

⁴Bed i yomcuny i Rwot, en bino miyi gin ame cunyi mito ducu.

⁵Mi kwoni i ciŋ Rwot, gene, en bino tiyo ticcere.

⁶En bino miyo berri ryeny calo ceŋ, kede kiteni atira calo ceŋ ame ryeny i cuny dyeceŋ.

⁷Bed mot i nyim Rwot, kure kun idio cunyi; cunyi kur bed cwer pi jo ame lonyo dwoŋ baŋgi, kadi i kom jo ame yiko tam areco i cunygi.

⁸Kur imi akemo maki, cunyi daŋ kur cwer; kur imi cunyi bed cwer, pien kela ka gin arac keken.

⁹Pien jo ame kitegi reco, obino nekogi oko, ento jo ame kuro Rwot bino leyo lobo.

¹⁰Odoŋ kare anonokkoro keken, jo a kitegi reco bino rwenyo atwal; kadi bed inen i kabedogi aber odoco, ibino nwoŋo ni gin doŋ pe kuno.

¹¹Ento jo ame mwol, bino leyo lobo, obino bedo i yomcuny meicel, pi lonyo adwoŋ ame obino bedo kede.

¹²Otim tim areco poro kop i komjo a kitegi atira, dok okao lakgi atek i komgi.

¹³Ento otim tim areco, Rwot nyero anyera, pien en neno ni nino me ŋolo kop i komgi tye abino.

¹⁴Otim tim areco woto pala romogi, dok daŋ otelo akud aterogi, me neko ocan kedejo a piny oloo, me neko jo ame cunygi atira;

¹⁵pala romogi-nono bino lokere cobo cunygi kengi, akud aterogi daŋ obino turo oko.

¹⁶Gin anok ame dano a kite atira tye kede, ber, kato lwak lonyo atye ata ame tye i ciŋ dano a kite rac.

¹⁷Pien ciŋ jo areco bino tur oko, ento Rwot bino gwoko jo akitegi atira.

¹⁸Rwot gwokojo ame mom i balloro, gin ame gin oleo bino perakino waŋ i waŋ,

¹⁹lewic mom bino makogi i kare me can, i kare me kec, gin bino bedo i can adwoŋ, i kare me kec gin bino bedo i cam adwoŋ.

²⁰Cite jo a kitegi reco, gin bino to oko, jo ame dago Rwot, bino rwenyo oko, obino top calo lum i potti, obino ket oko calo yito,

²¹Dano arac koporo banya ento mom te culo, ento jo a kitegi atira okica, dok omio jo jamigi.

²²Jo ame Rwot omio gum en ame bino leyo lobo, ento jo ame en oceno, bino to oko.

²³Rwot gire en ame telo dano, en mio dano moko i yo aber ame yomo cunye.

²⁴Kadi bed kodi dano-nono rette, ento pwod twero ya malo, pien Rwot en a mako ciŋe me peye.

²⁵Rik an atin, ento aman doŋ ati oko, cite waŋa mom ru oneno ŋat a kite atira ame oweko ata, akadi itino mere kun tye akwayo cem akwa.

²⁶En kare ducu ber, mio jami amia, dok daŋ jo koporo jami baŋe, itino mere daŋ doko jo ame dok kelli jo ocele gum.

²⁷Ya oko i timo gin arac, tim gin aber, mannono bino miyo iperakino i lobo.

²⁸Rwot maro ŋolo kop atira, en mom bino weko jo mere a gene ata. Jo a kitegi atira, Rwot bino gwoko nakanaka, cite itino a jo areco, Rwot bino neko oko.

²⁹Jo a kitegi atira bino leyo lobo, eka ote bedo iye atwal.

³⁰Jo a kitegi atira kobo kop me ryeko, okobo kop ame tye atira.

³¹Cik Obaŋagi mom rwenyo i cunygi, tyengi mom cer atata i yo ame gin lubo.

³²Dano arac neno ŋat a kite atira, eka te yenyo yo me neke oko,

³³Cite Rwot gire mom bino weko dano a kite atira poto i ciŋ okworrere, dok mom bino miyo oŋolo kop loc ka ce opidde.

³⁴Gen Rwot, lub yo mere, en bino miyi bedo kede twer me leyo lobo, yin ibino neno kite ame jo areco to kede.

³⁵Aneno dano ame kite rac ame apala okato kare, kun doŋo adoŋa calo yat me Lebanon.

³⁶Nen ka dok abeo kan ame en tye iye iceŋ, anwoŋo doŋ pe kuno, kadi bed ayeny, mom atwero nwoŋo.

³⁷Koŋ inen dano ame balloro mom i kome, dok inen dano ame cunye atira, pien dano ame kelo kuc, ikwae bino bedo apol.

³⁸Cite otur cik obino tyekogi oko awaŋe acel, ikwae a jo areco obino neko oko.

³⁹Rwot en a laro jo a kitegi atira, en obedo ka larregi i kare me peko.

⁴⁰Rwot konyogi dok larogi, en larogi i ciŋ jo areco, te bedo kwo, pien gin oriŋo olaro baŋe.