Read lango Jabuli 39 Bible Online

Jabuli 39 - lango bible

Jabuli 39

¹Baŋ adwoŋ wer: Pi Jedutun. Man wer a Daudi. An akobo ni, abino gwoko kita, me wek kur atim balloro i kop ame ya i doga; abino liŋ gira aliŋa, i nyim jo a kitegi reco.

²Abedo calo ŋat a lebe oto kun aliŋ aliŋa, abedo gira mot kun mom akobo kopporo, kadi bed cwer cunya onwoŋo tye amedde ameda.

³Cunya onwoŋo doŋ lyet calo mac, par onwoŋo ocira oko, mac te cako lyel, ate doŋ cako kop aboŋo lworo.

⁴Akobo ni, “Mi aŋe agikkina, Ama Rwot. Kare ame imia doŋ odoŋ rom mene? Mia aŋe kite ame abino rwenyo kede,

⁵Koŋ inen, imio kare me kwona obedo acecek meicel, kare me kwona mom ginnoro kadi acel i nyimi. Ateteni dano acel acel gire calo yamo ata-ni.

⁶Nen jo luŋ wirre calo tipo, jo gire bedo lolle nono pi gin a konyere mom, dano bedo coko lwak lim adwoŋ ate kun mom ŋeo ŋat ame abino leyo.

⁷“Kara an pwod dok akuro ŋo, Ama Rwot?” An gira atye kede gen piri.

⁸Lara i kom balle ducu. Kur imi jo amiŋ bed nyera.

⁹Leba gira oto oko, pe aromo kobo kopporo, pien mannono gire yin en itimo.

¹⁰Kur dok imedde pwoda kede abironi, adoŋ me ciŋi doŋ mito neka oko.

¹¹Yin ka igoo dano pi juke i ballere, nwoŋo doŋ ityeko ginnoro luŋ aber i baŋe, calo nyenye ame balo boŋo, ateteni, jo luŋ gire calo yamo ata-ni.

¹²“Winy kwacca, Ama Rwot, cik yiti iwiny kokona, kur iliŋ aliŋa ka akok baŋi. An abedo weloni ame mom ri baŋi an aloŋ piny calo kwarina luŋ.

¹³Wir waŋ inen teŋe, me koŋ abed yomcuny, kun mom ru aya oko i kwo me lobo man ate rwenyo oko atwal.”