Read lango Jabuli 40 Bible Online

Jabuli 40 - lango bible

Jabuli 40

¹Baŋ adwoŋ wer: Man wer a Daudi. Akuro gira Rwot kun adio cunya, en okulle piny baŋa te winyo kokona.

²En owota i twon burrono arac meicel, i twon coto moro anwaŋ meicel, te miya cuŋ i wi kidi malo, kun mia acuŋ atek odoco.

³Opwonya kede wer anyen, wer me pako Obaŋawa. Jo apol meicel bino neno, lworo te makogi, ote cako doŋ geno Rwot.

⁴Tye kede winyo dano ame geno Rwot, ame pe lokere baŋ jo ame wakere, ame mom lubo jo ogak oko i woro cal jogi.

⁵Ama Rwot Obaŋana, itimo gigi mogo me awura meicel, dok tammi luŋ tye i komwa, mom tye ŋattoro ame cal kedi. Kono onwoŋo an abedo rabo pirgi, kono onwoŋo pol meicel ame mom oromo kwano welgi.

⁶Yin gire mom imito gin ame oŋolo kede mot ame omio, ento ityeko yabo yita me awiny kop, Yii mom obedo yom i gin ame owaŋo alutu, kadi gin ame oŋolo pi bal.

⁷An ate kobo ni, “An ene doŋ abino; acalo yam ocoo i koma i buk adola.

⁸Amito cunya bed yom i tiyo gin, ame yin imito, Ama Obaŋana, cikki gire mom rwenyo i cunya.”

⁹Atyeko rabo pi amut aber me larre, me yomcuny, i akina lwak ocokere karacel an gira mom aliŋ aliŋa kadi acel kite ame yin iŋeo kede, Ama Rwot.

¹⁰Pe akano kop i cunya i kom kite ame ilaro kede jo, abedo rabo pi kite ame ilaro kede jo kun ibedo ŋat a genne, atito daŋ pi marri a mom lokere kannaler, kede pi kite ame yin igenne kede, arabo pirgi luŋ i akina lwak ocokere karacel.

¹¹Ama Rwot, kur itwona kicani, mii marri a mom lokere kede kiteni atira gwoka nakanaka.

¹²Pien gin arac ame ogura dyere welgi mom kwanne, balle doŋ dwoŋ ame onua oko, omio mom doŋ aromo neno piny, welgi pol meicel ame kato yer wia oko, cunya doŋ mom tek kadi acel.

¹³Ama Rwot, cunyi myero bed ayom me lara, ru lara, Ama Rwot.

¹⁴Mi lewic makgi dok ibabaŋogi oko, gin jo ame mito kwanyo kwona, migi olokere odok cen i twon lewic, gin jo ame mito timma rac.

¹⁵Mi twon lewic adwoŋ mak jo ame nyera, jo ame kobba ni, ber, ber.

¹⁶Cite myero imi jo luŋ ame wori bed i yomcuny, dok olel meicel piri; myero imi jo ame maro larreni, obedo kobo kare ducu ni, “Rwot gire dwoŋ.”

¹⁷Aco an gira, an acan, dok piny oloa oko; cite Rwot gire paro pira. Yin gire en ame ikonya dok ilara, kur ibed gal, Ama Obaŋana.