Read lango Jabuli 41 Bible Online

Jabuli 41 - lango bible

Jabuli 41

¹Baŋ adwoŋ wer. Man wer a Daudi. Tye kede winyo ŋat ame paro pi ocan, Rwot lare i kare ame en tye kede peko.

²Rwot gwoke mio en bedo kwo, obino lwoŋe ni ŋat a kome gum i lobo; yin mom ibino miye i ciŋ okworrere, me otime kite ame yigi mito.

³Rwot bino gwoke ka kome lit ame obuto piny i wi tanda, Rwot bino miyo en caŋ aber i kom two mere.

⁴Ento an, akobo ni, “Ama Rwot, kica myero maki i koma, caŋa pien an gira aroco i nyimi.”

⁵Okworra kobo kop arac i koma, kun okobo ni “Kara en lonnono ato awene, me nyiŋe te rwenyo oko?”

⁶Ka ce ŋattoro i akinagi obino me limma, kobo kop ame tere pe, kun cunye pupuka i kop me goba, ka ce en okato doŋ oko, cako kobo koppere kannaler,

⁷Jo ducu ame daga, bedo kwoto nyiŋa karacel, obedo tamo pi gin arac keken i koma,

⁸Gin okobo ni, “Two arac meicel doŋ omake, mom doŋ bino bwot kadi acel a mom oto.”

⁹Kadi dyera ame ageno ikokome, ame onywako kede cem daŋ mito rwacca piny.

¹⁰Ento yin tima kica, Ama Rwot, tiŋa malo me wek acul kworra i komgi.

¹¹Ka ce okworra mom oloa, abino ŋeyo ni cunyi tye i koma.

¹²Ento yin ikonya, pien cunya ler, iketa me bedo i nyimi nakanaka.

¹³Rwot Obaŋa me Icrael myero pwo, myero pake nakanaka! Amen, dok Amen.