Read lango Jabuli 44 Bible Online

Jabuli 44 - lango bible

Jabuli 44

¹Baŋ adwoŋ wer: Man wer ikwae a Kora. Wan doŋ otyeko winyo yitwa, Ama Obaŋa, kwariwa daŋ otittiwa, ginnoro luŋ ame itimo i karegi, i kare ame doŋ okato oko aŋec.

²Yin rik iryemo rok ocele oko kede twerri, ite miyo joni bedo i lobogi calo yen ame opito, rik iketo can apek meicel i wi rok ocele, cite kwariwa te bedo bedo i kuc.

³Kwariwa rik mom ogamo lobo-naca i pala romogi, dok daŋ mom tekogi en ame omiogi oloo lweny, cite otimere pi tekoni kede pi twerri, dok pi waŋ me kica ame ibedo nenogi kede, pien cunyi onwoŋo yom i komgi.

⁴Yin ibedo abakana kede Obaŋana, yinen ayamiyubo loc pi Yakobo.

⁵Pi konnyi omio wan oryemo okworwa oko odok cen, pi nyiŋi omio wan onyono jo ame obino me lweny i komwa oko.

⁶Pien an gira mom ageno akud aterona, dok pala romona mom romo lara.

⁷Ento yin gire en ilarowa i ciŋ okworwa, ibabaŋo jo ame onwoŋo dagowa oko.

⁸Obaŋa omiowa obedo wakere kare luŋ, wan giwa obino medde pwoyo nyiŋi nakanaka.

⁹Nen, yin doŋ ibolowa oko, oyot doŋ ayota, nen doŋ iwoto karacel i monywa i lweny.

¹⁰Imiowa oloko okworwa ŋewa, okworwa te yako jami apol meicel.

¹¹Imiowa doŋ odoko calo rommi me aneka, imiowa doŋ okeketa atata i akina orok.

¹²Nen, doŋ icato lwakki oko i wel apiny apinya, kun mom imito ni culli limmoro abup pirgi.

¹³Imio jo ame ceggi kedwa doŋ caowa acaa, jo ame ogurowa dyere doŋ nywarowa kun onyerowa anyera,

¹⁴Imio rok ocele doŋ bedo boko kop i komwa, odoko doŋ gi-anyera a jo i akina rok luŋ.

¹⁵Aparo doŋ pi lewic ame atye kede ceŋ iyul, lewic doŋ maka meicel,

¹⁶nyim jo ame yeta kede jo ame nywara, i nyim okworra ame daga.

¹⁷Magi luŋ otimere i komwa, kadi bed wan wiwa mom owil oko i komi, kadi wan mom oturo cikereni.

¹⁸Cunywa mom olokere me weki, mom daŋ oweko lubo yo ame yin imito,

¹⁹cite yin iwekowa oko kan ikwe bedo iye, ite miyo piny acol icuc wumowa oko.

²⁰Ka ce wiwa onwoŋo owil oko i kom nyiŋ Obaŋawa, onyo ka ocako woro Obaŋa moro ocele,

²¹kono Obaŋa mom oŋeo oko? pien en ŋeo muŋŋoro luŋ ame tye i cuny dano.

²²Piri obedo ka nekowa ceŋ iyul; okwanowa bala rommi me aneka.

²³Ya ba malo, Ama Rwot, piŋo kara itye ka nino anina? Co doŋ oko! Pe ibwola oko, pe iwekwa oko atwal.

²⁴Piŋo kara iponniwa oko? Piŋo wii owil oko i kom can ame otye kede, kun inenowa anena ka otye awunowa?

²⁵Nen wan doŋ orette oko piny i lobo, oryebere piny iyi apua, pien doŋ oloowa oko,

²⁶Ya malo; ibin ikonywa, Larwa pi marri a mom lokere.