Read lango Jabuli 45 Bible Online

Jabuli 45 - lango bible

Jabuli 45

¹Baŋ adwoŋ wer: Man wer me mar ame ikwae a Kora owero. Kop abeco keken en ame tyei cunya, koppa-nono akobo gira baŋ abaka, leba bit calo alam aran ame adiro i coc.

²Yin en ame iber meicel ikato jo ocele luŋ, kop ame ikobo luŋ opoŋ ka i kica keken, mannono omio Obaŋa doŋ omii gum ame perakino nakanaka.

³Twe pala romoni iyi amuruni, Ama yin i twon lo atek meicel, i kwogoni kede i twerri.

⁴Yon i ŋwec me loc pi kwogoni, me lweny pi ateni kede me gwoko kite ame tye atir, mii ciŋi me tuŋ cem otim gigi mogo ame mio jo lworo.

⁵Ateroni bit meicel, ka icelo i cuny okworri, rok luŋ rette oko i te locci.

⁶Kom me locci, yin Obaŋa, bino perakino odoco, abiro me locci, en abiro a yin iŋolo i kop atira; yin imaro kite atira, yii dag tim arac,

⁷Mannono omio Obaŋa, ame en Obaŋani, omi dit, en omii yomcuny meicel pi woro ame en owori kede, ame kato me owoteni oko.

⁸Rukki luŋ okikiro iye murra kede yat a ŋwece kur, kede kite moo ocele luŋ akur kede kacia amittere. Ipaconi ame okwogo i lak lyec, wer ogoo naŋa yomoro cunyi nadi.

⁹Anyira abaka daŋ tye i akina monni ame oworo, agoŋŋi tye ocuŋ i ciŋi tuŋ cem, kun oruko ruk ame okwogo kome i jabu me Opir.

¹⁰Koŋ iwiny nyara, ter yiti iwiny koppa, wi myero wil oko i kom rokki, kede i kom jo me doggola a kwaroni.

¹¹Berri bino miyo abaka miti; kite acalo en doŋ tye acalo rwotti, myero iryebere i nyime.

¹²Jo Turo bino kelo mot adwoŋ meicel baŋi pi berri baŋ dano, olonyo me rok apapat bino kwayo kony i baŋi kun okelli kit limmoro ducu.

¹³Nyaka abaka orukkere meicel i cika mere, orukkere i boŋo ame okwogo meicel i jabu,

¹⁴Otere baŋ abaka, kun oruko boŋŋi ame raŋigi papat, ame anyira wadgi ame alwoke tye alubo yore,

¹⁵Oterogi i yomcuny adwoŋ kede lelo, i kare ame gin donyo i paco abaka.

¹⁶Akaka kwarini, bino bedo awobeni, ibino miyogi obedo oloc i wi lobo luŋ,

¹⁷Abino miyo odworo nyiŋi mwaka i mwaka i kare a lwagi jo me kare ducu, mannono bino miyo rok luŋ paki waŋ i waŋ.