Read lango Jabuli 48 Bible Online

Jabuli 48 - lango bible

Jabuli 48

¹Wer ikwae a Kora. Rwot dwoŋ meicel, pi mannonomyero pake, i boma Obaŋawa.

²Kidi mere acil, ame ocuŋ malo i twon kwogo adwoŋ, yomoro cuny jo me wi lobo ducu. En kidi me Cion ame tye tutuŋ anyarodi, boma abaka dwoŋ meicel.

³Obaŋa onyutte i udi mere atek, onyutte ni en obedo kan atek ame gwoko jo.

⁴Nen ba, obakki me wi lobo tye ocokere, gin obino ote cokere karacel.

⁵Kare ame gin oneno, ote bedo kede wur, lworo omakogi ote riŋo oko;

⁶komgi te cako myel atek meicel kede rem ame calo dako amerem me nywal ogoo.

⁷Pien yin rik ibalo mel me Tarcic, i yo ame oya i tutuŋ kide.

⁸Kite ame onwoŋo owinyo kede, en ame doŋ otyeko neno kede waŋwa, i paco a Rwot me mony, i paco Obaŋawa, ame Obaŋa doŋ omio ocuŋ oko atek odoco.

⁹Wan obedo tamo kop i kom marri a mom lokere, Ama Obaŋa, i dye odi acil.

¹⁰Kite ame nyiŋi orwo kede, opaki daŋ amannono i wi lobo ducu, Ciŋi me tuŋcem tye iye twer me loc,

¹¹mii kidi me Cion obed i yomcuny. Mi anyira me Juda bed i yomcuny, pi kite ame yin iŋolo kede kop.

¹²Wot wunu i dye Cion, iman wunu ducu, kwan wunu gedo luŋ ame ocuŋ malo iguŋ,

¹³nen wunu apama cellere aber, nen wunu udi adoŋo luŋ iye, me irab wunu pire baŋ lwagi jo ame bino lubowu;

¹⁴ni man en obedo Obaŋa, en obedo Obaŋawa me waŋ i waŋ. En a bino telowa nakanaka.