Read lango Jabuli 49 Bible Online

Jabuli 49 - lango bible

Jabuli 49

¹Baŋ adwoŋ wer: Man wer ikwae a Kora. Wun rok luŋ, winy wunu kop man. Ter wunu yitwu, wun jo ame bedo i wi podo luŋ,

²jo ame tye i rwom amalo kede i rwom apiny, olonyo kede ocan karacel.

³Kop me ryeko bino donnyo i doga, tam ame ya i cunya, bino kelo niaŋ atut.

⁴Abino tero yita me winyo pwony me ryeko, koc kede litogi abino goyo agoa i naŋa opuk.

⁵Kara ŋo ame mio abedo kede lworo i kare me peko, ka omonena ame wuna agura oko dyere,

⁶ame gin jo ame geŋo lonyogi, kun owakere pi lwak lim ame tye i ciŋgi?

⁷Ateteni, mom gire tye dano moro ame romo culo lim me lakere mere kene, onyo ame twero culo lim baŋ Obaŋa me wilo kwo mere.

⁸Pien lim me wilo kwo mere bup meicel, mom romme culo kadi acel.

⁹Mannono omio dano mom romo bedo kwo nakanaka, kun mom donyo piny i bur.

¹⁰En gire ŋeo aber ni anaka jo aryek daŋ to, amiŋo kede ŋat ame wie mom tio daŋ to amannono, oweko lim ame otye kede baŋ jo ocele.

¹¹Lyel en ame doŋ te bedo pacogi me bedo atwal, bedo doŋ kabedogi waŋ i waŋ, kadi oweko lwak potti ikwaegi a rom mene me poyo nyiŋgi.

¹²Dano mom romo perakino i kwogo mere nakanaka, en rom aroma i leyi me tim ame to oko,

¹³Man en can ame poto i kom jo ame tye i gen me miŋo, agikki a jo ame tye i yomcuny pi dul jami ame otye kede.

¹⁴Lyel gire kurogi akura calo rommi, to en a bino bedo akwatgi. Gin bino wot atir naka i lyel, cil a komgi te rwenyo oko. Lyel en a bino bedo pacogi.

¹⁵Rwot gire bino lakoro kwona oko i teko a lyel, pien en bino gama baŋe.

¹⁶Lworo kur maki ka ce dano moro odoko alonyo, kadi bed kwogo me ode tye amedde ameda,

¹⁷Pien i kare me to mere mom bino tiŋo ginnoro woto kede kadi acel, kwogo mere mom bino lube piny i bur kuno,

¹⁸Kadi bed en twero tamo ni ebedo i yomcuny i kare me kwo mere, kadi bed jo pake ka ce en onwoŋo ginnoro aber pire kene,

¹⁹en pwod bino to te wot nywako kabedo i lwagi a kwari mere i lyel kun mom dok neno waŋ cen atwal.

²⁰Dano mom romo perakino i kwogo mere nakanaka, en rom aroma i leyi me tim ame to oko.