Read lango Jabuli 51 Bible Online

Jabuli 51 - lango bible

Jabuli 51

¹Baŋ adwoŋ wer. Man wer jabuli ame Daudi ocoo i kare adwarpiny Natan obino baŋe i kare ame en doŋ otyeko balo gin kede Betceba. Tima kica, Ama Obaŋa, tim ber ijwa balle oko berri a mom lokere.

²Lwok gin arac oko i koma, dok ilonya i kom balla.

³Pien an aŋeo gira balla, kare luŋ wia po i kom bal ame atimo,

⁴An gira atyeko balo baŋi, abalo baŋi yin ikomi, atyeko timo gin anen arac i nyimi wek kop ame yin iŋolo onyut ni kiteni atira, dok ka iŋolo kop, balloro mom mwoŋere iye.

⁵Nen ba, an rik onywala i bal, acako timo bal con ame pwod atye iyi totaa.

⁶Nen, yin imito kop ateni en ame ya iyi dano, pi mannono, myero ipwony cunya a mom nen me bedo ryek.

⁷Lama kede boke olwedo, me ate doko doŋ acil, lwoka, me abed atar akato pee oko.

⁸Mia abed i yomcuny adwoŋ kede lelo, mi cogo ame doŋ ituro oleli,

⁹Wum waŋi oko, kur inen balla, dok ijwa balla oko luŋ,

¹⁰Mi cunya bed acil, Ama Obaŋa, ket cuny anyen dok aler i yia.

¹¹Kur iryema oko i nyimi, kur daŋ ikwany Cunnyi Acil oko i koma,

¹²Dwoggo yomcuny me larre baŋa, mia cuny ame mia alubo cikki,

¹³Bino miyo apwonyo obal me luba yo ame imito, obalo ote lokere dwogo baŋi.

¹⁴Lara i kom bal me to, Ama Obaŋa, yin ibedo Obaŋa ame lara, cite leba bino wero wer me larri kannaler.

¹⁵Yab doga oko, Ama Rwot, cite leba bino wero wer me paki.

¹⁶Pien yin giri cunyi mom yom i mot ame oyali kede, kadi ayali i mot awaŋa, mom gire romo yomoro cunyi.

¹⁷Mot ame Obaŋa pwoo obedo cuny ame ŋut, yin gire mom icayo ŋat a cunye cwer dok ŋut, Ama Obaŋa.

¹⁸Tim Cion ber pi ber a cunyi, dok iger apama cel me Jerucalem odoco.

¹⁹Ite cako doŋ jolo i yomcuny mot me yalli i kite atira, mot awaŋa, kede mot owaŋo alutu, ote daŋ doŋ cako yali kede twoni i wi keno lammi.