Read lango Jabuli 55 Bible Online

Jabuli 55 - lango bible

Jabuli 55

¹Baŋ adwoŋ, wer, Man wer ame ogoo agoa i naŋa. Man wer a Mackil ame Daudi owero. Cik yiti iwiny kwacca, Ama Obaŋa, kur ipon oko ka abako doga baŋi.

²Winy koppa, dok i gam doga, peko ame atye kede doŋ oloo tekona oko,

³Woo okworra doŋ obalo cunya oko, pi kite ame jo areco wuno kede jo, Pien gin en ame kelo peko i koma, okudo akemo meicel i koma, oloka doŋ adoko amonegi.

⁴Cwercuny doŋ ocira oko, lworo me to daŋ doŋ ocira oko.

⁵Lworo kede myelkom daŋ doŋ omaka oko, tipo koma oto oko,

⁶Omio doŋ atye ka paro ni kono atye kede bwoma calo amam, kono atwarre awoto gira oko kan ocele me awe,

⁷Ateteni, kono awoto gira oko teŋe, kono awoto abedo gira i tim.

⁸Kono ayutte ayuta me wot nwoŋo ka weona, i dye yamo a kutu atek, kede i kom yamo ajuru me kot.

⁹Ama Rwot, bal yikgi oko, rub lebgi oko, pien atye ka neno tim me gero kede lweny keken en ame tye i boma,

¹⁰Dyeceŋ kede dyewor gin otye ka rimo piny, kun omano cel me boma, tim areco kede peko a kitgi apapat tye ka nen i ye,

¹¹To tye ka nen i dye boma luŋ, awunawuna dwoŋ meicel i cuk, bwolo jo mom daŋ rwenyo iye.

¹²Kono okworra en a tye ka kobo kop arac i koma-nono, kono koŋ atemo diyo cunya, kono jo ame daga en a tye aka timo tim me anywar i komanono, kono atemo koŋ pono gira oko.

¹³Ento anwoŋo ni obedo yin, wadwa, yin ame wan owoto kedi acel, dok dyera me kare ducu.

¹⁴Yam oboko koppogo amit kedi karacel, i ot Obaŋa-gu owoto karacel.

¹⁵To myero nekgi oko gire; migi odonyo piny i lyel ame okwo; pien tim arac nywako kedgi kabedo.

¹⁶Cite an gira akok baŋ Obaŋa; Rwot gire bino lara.

¹⁷Odiko, dyeceŋ kede otyeno, an gira acwao kokona baŋe kun acur; en gire bino winyo dwona.

¹⁸En bino laro tipona mia abedo i kuc i kom lweny ame abedo lwenyo, pien jo apol meicel tye ka lweny i koma.

¹⁹Obaŋa ame abedo i wi kom loccere cakere con i con, bino winyo kokona, te miyogi bedo amwol; pien gin mom ogwoko cik, dok daŋ mom oworo Obaŋa kadi acel.

²⁰Awotta ryeo bade me lweny i kom owote mere; kun turo cikere ame yam ecikere kede oko,

²¹Kop i doge onwoŋo pwot kato moo dyaŋ oko, cite lweny mom rwenyo i cunye; kop ame en kobo onwoŋo kweo cuny dano kato moo oko, cite ŋolo dano calo pala lweny,

²²Ket yec apek luŋ i kom Rwot, cite en bino konyi, en mom ye ni jer jo a kitegi atira teŋe.

²³Ento yin gire ibino retogi oko piny, Ama Obaŋa, i twon burroro atut meicel; gin jo ame oonyo remo a jo ocele, kede oket erupe i kom jo wadgi, mom obino perakino otuno i nucu me kare me kwogi. Cite an gira abino geni.