Read lango Jabuli 59 Bible Online

Jabuli 59 - lango bible

Jabuli 59

¹Baŋ adwoŋ, wer. Daudi ame en owero i kare ame Caulo ocwao dano me kure i ode me neke oko. Lara i ciŋ okworra, Ama Obaŋa, gwoka i ciŋ jo ame bino me bino lweny i koma,

²lara i ciŋ otim tim areco, kede i ciŋ jo ame maro onyo remo a jo.

³Nen, gin obedo kiya me kwanyo kwona; jo ager ocokere karacel me lweny i koma. Mom tye ginnoro arac ame atimo, balla moro daŋ mom, Ama Rwot,

⁴Mom atimo ginnoro arac gira, gin oriŋo oyotoyot i ka ponogi.

⁵Ama Rwot Obaŋa me mony, ya inen, ibin ikonya, Ama Obaŋa a jo Icrael. Co oko me iket can i kom rok luŋ; kur iwek ŋattoro kadi acel, i akina wegi erupe ame poro kop me timo gin arac.

⁶Otyeno luŋ gin odwogo ame ogweo calo gwogi, kun obebea i dye boma,

⁷Koŋ iwiny gin ame gin tye ka kobo! Kop i doggi bit calo pala romo. Gin obedo tamo tam i cunygi kun okobo ni, “Ŋa ame bino winyo gin ame wan okobo?”

⁸Ento yin gire inyerogi anyera, Ama Rwot; yin gire icao rok magi luŋ acaa.

⁹Ama yin ame ibedo tekona, abino gira wero wer me paki, pien yin Obaŋa ibedo cel atek me larrena.

¹⁰Obaŋana bino rwatte keda i marrere a mom lokere, en bino miyo aneno okworra acalo jo ame doŋ atyeko loyo.

¹¹Kur inekgi, naka mio jona wigi wil oko; keketogi atata pi tekoni, digi piny, Ama Rwot ame ibedo kwotwa.

¹²Myero imi makgi iyi awakagi, pien kop a ya i doggi tye iye bal, kopporo luŋ ame gin kobo tye iye bal. Pi ceno jo kede kobo goba,

¹³tyekgi oko akemoni, tyekgi oko luŋ aluŋa. Me jo luŋ ŋe ni Obaŋa en ame loo jo a Yakobo, tuno naka iyi agikki piny.

¹⁴Otyeno luŋ gin odwogo ame ogweo calo gwogi kun obe bea i dye boma,

¹⁵Obedo rimo piny pi yenyo cam, ka mom ru onwoŋo cam obedo ŋuŋura aŋura.

¹⁶Cite an abino wero wer me pako tekoni, idiko abino wero wer me pako marri a mom lokere, Pien yin en ibedo cel atek me gwoka, kede ka larena i kare me can.

¹⁷Ama Tekona, abino wero wer me paki, pien yin Obaŋa, ibedo cel atek me gwoka, Obaŋa ame onyuta marrere a mom lokere.