Read lango Jabuli 60 Bible Online

Jabuli 60 - lango bible

Jabuli 60

¹Baŋ adwoŋ wer. Man wer ame Daudi me pwonyo jo. En owero i kare ame Daudi olwenyo i jo Aramnakaraim kede dok i jo Aram-joba i kare ame Joab odwogo cen te bino neko jo Edom tutumia apar wie aryo i luŋ me Kado. Ama Obaŋa, ikwerowa doŋ oko, dok daŋ iloowa, akemo onwoŋo omaki i komwa, dwokwa i ciŋi ba, Ama Rwot.

²Imio lobo oyeŋere, imio obarre oko; yik kan ame obarre oko, pien mito rette oko.

³Imio joni oneno cannogo apek meicel; imiowa omato koŋo olok ame obalo wiwa oko.

⁴Yin doŋ iŋabo bendera malo pi jo ame wori, me larogi i lak atero ame obao.

⁵Me wek joni ame imaro larre, miwa oloo lweny i tekoni, dok igam daŋ dogwa.

⁶Obaŋa okobo kop i kabedo mere acil ni, “Abino poko Cekem oko i twon kwogo me loc, abino daŋ poko luŋ me Cukot.

⁷Gilead obedo mega, Manace daŋ mega; Epraim obedo tok nyonyo me geŋo wia, aco Juda te bedo abiro me locca.

⁸Ento Moab obedo becen me lwokka; abolo warona i kom Edom me nyuto ni aloc; abino redo redo me loc i wi jo Piriciti,”

⁹Ŋa abino kela i boma ame ocelo i cel atek? Ŋa abino tella yo me wot i Edom?

¹⁰Yin mom ikwerowa oko, Ama Obaŋa? Nen yin mom doŋ iwoto karacel i monywa.

¹¹Tim ber ikonywa me lweny i kom okworwa, pien kony ame dano en amio mom konyo ginnoro,

¹²Ka Obaŋa obedo lweny karacel kedwa, wan obino loyo, en gire ame bino nyono okworwa dio piny.