Read lango Jabuli 62 Bible Online

Jabuli 62 - lango bible

Jabuli 62

¹Baŋ adwoŋ wer. Man wer ame Daudi owero. An abedo mot kun ageno gira Obaŋa keken, pien larrena ya i baŋe.

²En kene en obedo kan atek me larrena, en cel atek ame gwoka; mom obino jera teŋe kadi acel.

³Wun luŋ ibino bedo wunu lweny i koma naka awene, mereta oko calo apama cel agoro?

⁴Oyiko ka kop me kwanyo dano oko i rwommere me dit, cunygi yom ata i kobo kop me goba. Olammi jo gum i kop i doggi keken, kun nwoŋo oceno dano acena i cunygi.

⁵An abedo mot kun ageno gira Obaŋa keken, pien gen ame atye kede oya i baŋe.

⁶En kene en obedo kan atek me larrena, en cel atek me gwoka; mom obino jera teŋe kadi acel.

⁷Larrena kede kwogona luŋ ya i baŋ Obaŋa, en obedo twon kidi moro atek ame gwoka, dok en obedo ka larrena.

⁸Gen wunu Obaŋa kare luŋ, wun jo luŋ gene wunu i cunywu ducu; Obaŋa en obedo ka larrewa.

⁹Jo ame tye i rwom a piny calo yamo, Jo ame tye i rwom amalo mom genne kadi acel, ame ka ipimogi luŋ i mijan, otiŋere malo oyotoyot calo yamo.

¹⁰Kur iket wunu genwu i tic me mayo jami a jo tetek, kur igen tic me yako jo, pien konnyere mom; ka ce lim onya i ciŋi, kur iketo cunyi iye.

¹¹Obaŋa okobo kop tyen me agege, tyen me aryo ate winyo koppere, ni Obaŋa en obedo won teko,

¹²dok ni yin gire, Ama Rwot, en ibedo won mar a mom lokere. Pien yin iculo ŋat acel acel ame oporo tic ame en otio.