Read lango Jabuli 66 Bible Online

Jabuli 66 - lango bible

Jabuli 66

¹Wun jo luŋ ame bedo i lobo, wo wunu i yomcuny,

²kun idworo wunu nyiŋ Obaŋa, ipake wunu i werrogo me kwogo.

³Kobbi wunu Obaŋa ni, “Yin itio tic me awura meicel, twer ame yin itye kede dwoŋ meicel, ame mio okworri mwolle amwola i nyimi.

⁴Jo luŋ ame tye i lobo, wori, gin luŋ owero wer me paki, kun owero opako kede nyiŋi.”

⁵Bye inen wunu gin ame Obaŋa otio, en tio gigi mogo ame iyiliyili meicel i akina dano,

⁶En omio pii i nam otwo oko imek, jo te beo i cuny kulo otwo kun owoto i tyengi. Wan rik ote bedo i yomcuny meicel i kome kuno,

⁷Twer ame en tye kede, omio en loo loccere nakanak, dok neno rok ducu, Jo ame wakere myero wek yiye nono nono.

⁸Pwo wunu Rwot Obaŋawa, wun rok ducu, wer wunu wer me pake, me jo winy.

⁹En ogwokowa omiowa pwod otye kwo, dok mom omio tyenwa ocer kadi acel.

¹⁰Yin gire doŋ ityeko temowa oko, Ama Obaŋa, itemowa kite ame otemo i ryal ame olio i mac.

¹¹Yin en ame rik ikelowa naka iyi boo, eka ite cibo yec apek i wiwa me ayea.

¹²Rik ite miyo jo bedo nyono wiwa, owoto kun obeo i dye mac kede i dye pii, kadi bed amannono, yin gire en ame dok ite kelowa i kabedo alac me kuc.

¹³An abino bino i odi, kun akelo mot awaŋa me yali, abino cobo kwoŋŋa luŋ ame akwoŋo i nyimi.

¹⁴Ginnoro luŋ ame doŋ atyeko kobo, abino cobo, kede ginnoro luŋ ame acikere me timo i kare ame atye i can.

¹⁵Abino yali i rommi ocwe calo mot awaŋana, kede yito ame duny bino baŋi ame ya i kom nyogi rommi ame awaŋ, abino yali i mot me twoni, kede nyogi dyegi.

¹⁶Wun jo luŋ ame lworo Obaŋa, myero ibin iwiny wunu, an abino titiwu gin ame Obaŋa otimo pira,

¹⁷Rik acwao kwacca baŋe i dwon aloŋo, ate daŋ pako nyiŋe kede wer.

¹⁸Kono onwoŋo rik akano balle oko i cunya, kono Rwot gire mom owinyo kwacca kadi acel.

¹⁹Cite amito kobo kannnaler ni Obaŋa owiny kwaca, en ociko yite te winyo kwacca luŋ ame akelo i nyime,

²⁰Obaŋa gire myero pwo, pien en gire mom okwero winyo kwacca, dok daŋ mom omio marrere a mom lokere oya i koma.