Read lango Jabuli 68 Bible Online

Jabuli 68 - lango bible

Jabuli 68

¹Baŋ adwoŋ wer: Man wer ame Daudi owero. Obaŋa myero ya malo, me mi okworerrera ket oko atata dok jo ame dage daŋ riŋ oko i nyime.

²Migi orweny oko i nyimi kite ame yito duny kede, kite ame odok kic me ye kede ka oketo i mac, mi jo a kitegi reco to daŋ kittono i nyimi, yin Obaŋa.

³Ento jo a kitegi atira, myero bed i yomcuny, migi olel i yomcuny i nyimi yin Obaŋa, mi yomcuny cirgi oko.

⁴Wer wunu baŋ Obaŋa, wer wunu wer me pako nyiŋe, yik wunu yo a ŋat ame kwano pol, Nyiŋe Rwot, dwore wunu, dok ibed wunu i yomcuny i nyime.

⁵Obaŋa ame bedo i kabedo mere acil, en ame obedo papo itino kic, kede ogwok mon a coggi oto,

⁶Obaŋa en ame mio acan paco mere me bedo, en telo jo ame tye i ot kol, terogi i kuc, ento jo ame maro jem en wekogi obedo i lobo otwo.

⁷Ama Obaŋa, i kare ame itelo wi lwakki, i kare ame iwoto kedgi i dye tim,

⁸lobo oyeŋere, kot te core piny kun ya i polo, pi nyiŋi, yin Obaŋa, anaka kidi me Cinai daŋ oyeŋere inyimi yin Obaŋa. Yin Obaŋa a jo Icrael.

⁹Yin rik imio kot adwoŋ meicel ocwe i lobo, Ama Obaŋa, i mio teko baŋ jo ame iyero i kare ame gin odoko agoro.

¹⁰Lwakki bedo iye acalo pacogi, dok imio teko baŋ jo ame piny oloo, Ama Obaŋa, mannono yin itimo pi berri giri.

¹¹Rwot en omio cik, Mon ame tero amut aberi, pol meicel, kun okob ni,

¹²“Obakki karacel kede monygi tye ka riŋo oko,” mon ame odoŋ paco, poko jami ame oyako i lweny,

¹³kadi bed gin obuto iyi anok me buto a rommi, onen calo awele ame okwogo bwomgi kede ryal, dok ame yer komgi obedo lulum calo jabu.

¹⁴Kare ame Won Twer okeketo obakki i kuno oko, kot ocwe i pee i WI kidi me Calmon.

¹⁵Kidi me Bacan kara tek kit man, kidi me Bacan wie pol ladi!

¹⁶Yin kidi ame wii aboco mere pol wok-ki, piŋo kara ineno piny i waŋ me nyeko, naka kidi ame Obaŋa oyero me bedo iye. Rwot gire bino bedo kuno nakanaka,

¹⁷Rwot obino kun ya i Cinai, woto i ode acil, obino i lwak gadigadi tutumia i tutumia.

¹⁸Oyito naka i wi kidi malo, kun coko lwak opii apol meicel woto kede, kun daŋ gamo mot ame jo mie, naka i baŋ jo ame yam jem i kome.

¹⁹Rwot Obaŋa bino bedo kuno. Rwot gire myero pwo, pien en nino i nino tiŋowa pekowa luŋ, Obaŋa gire en ame larowa.

²⁰Obaŋawa gire en ame larowa Obaŋawa, en Rwot ame larowa i to.

²¹Ento Obaŋa bino goyo wi okworrere ŋiŋido oko, jo ame yer wigi boco, ame mom mito weko kitegi areco.

²²Rwot ociko ni, “Abino dwoggogi i Bacan, abino kwanyogi oko i piny, kun awotogi i nam atut,

²³me ibid tyenwu kede remo okworwu, me leb gwogiwu pipila me naŋo remo okworwu.”

²⁴Jo luŋ tye ka neno wotti, Ama Obaŋa, wotti, yin Obaŋana, ame ibedo Abakana, ame iwoto kede i odi acil,

²⁵kun ower telo yo, okut bilo lubogi, kun i dyeregi tye iye anyira ame goo ajaa.

²⁶“Myero ipwo wunu Obaŋa i dye lwak adwoŋ, wun ikwae a jo Icrael luŋ, myero ipwo wunu Rwot.”

²⁷Benjamin ame obedo atekere atidi meicel, en ame otelo yo, kun rwode a jo Juda tye iyeryoŋetgi karacel kede rwode a jo Jabulon kede me a Naputal.

²⁸Nyut twerri, Ama Obaŋa, nyut tekki ame itio kede pirwa, Ama Obaŋa.

²⁹I odi ame tye i Jerucalem, obakki kela motgi me bino yalli.

³⁰Ama Obaŋa, juk leyi ager ame tye i akina aladu, twoni apipim kede roce a rok oceie, tuno ka gin oryebere piny i nyimi, ote miyi motgi me ryal, eketo jo ame maro lweny oko.

³¹Okwena adoŋo bino ya i Miciri, jo Eciopia bino taŋo ciŋgi kwao Obaŋa,

³²Wer wunu wer me pako Obaŋa, wun oloc luŋ me lobo, wer wunu wer me pako Rwot.

³³Wer wunu wer baŋ ŋat ame woto malo i polo, i pol acon meicel, winy wunu kite ame en tye ka redo kede i dwon aloŋo.

³⁴Rab wunu pi teko Obaŋa, kwogo mere tye i kom Icrael, teko mere tye malo i polo.

³⁵Obaŋa iyiliyili meicel i ode acil, en Rwot Obaŋa me Icrael, ame mio teko kede twer baŋ jo mere. Wun myero ipwo wunu Obaŋa.