Read lango Jabuli 69 Bible Online

Jabuli 69 - lango bible

Jabuli 69

¹Baŋ adwoŋ wer: Man en wer a Daudi owero wer ni. Lara ba, Ama Obaŋa! Pien pii doŋ amito mwonya oko.

²Amoko doŋ oko i te coto piny, kan ame tyena mo romo nyono kadi acel; atuno doŋ i pii kan atut meicel, ame doŋ tye atagere kun corre i wia malo.

³Koko doŋ oola oko, dwona daŋ doŋ orwe oko; waŋa daŋ doŋ oballe oko, kun akuro Obaŋana,

⁴Jo ame daga nononono aboŋo ginnoro ame abalo, opol atek ame kato yer wia oko; jo ame tye ka coko doga nononono i kop me goba, otek meicel gin jo ame mito neka nono. Gin openya me dwoko gin ame mom akwanyo kadi acel.

⁵Ama Obaŋana, yin gire iŋeo miŋona luŋ, ginnoro luŋ ame an abalo, tye kannaler i nyimi.

⁶Kur imi lewic mak jo ame geni pira, Ama Rwot Obaŋa me mony; kur imi ale twod jo ame yenyi pira, Ama Rwot Obaŋa me Icrael.

⁷An doŋ akanyo ayet meicel piri, ame omio lewic doŋ ocira oko.

⁸Acalo doŋ arok i akina omegona, omegona ame onywala kedgi karacel, mom doŋ ŋea.

⁹Akemo omaka pi lit a odi, ayet ame jo yeti kede, poto naka i koma.

¹⁰Ka aporo mwolle kun akanyo kec, jo yeta ayeta.

¹¹Ka ruko boŋo me kwero cola, adoko gin me lolo doggi.

¹²Jo ame bedo piny i dogcel, kobo nyiŋa meicel, jo ame mer i koŋo olok, ocako wergi kun owera kede.

¹³Cite an i tuŋ baŋa, Ama Rwot, akelo gira kwacca i nyimi, akelo gira i kare ame mitte ikokome, gam kwacca, Ama Obaŋa pi marri a mom lokere,

¹⁴Lara oko, Ama Obaŋa, pi konnyi adwoŋ me kur amok i coto; lara i ciŋ okworra ame daga, lara i pii atut meicel.

¹⁵Kur imi pii ame amol atek meicel tera oko, kur imi amwonyere oko i pii atut, dok daŋ kur imi adony piny i te bur.

¹⁶Gam doga, Ama Rwot, pien marri a mom lokere ber, lokere inena i waŋ me kica, kite ame kicani dwoŋ kede.

¹⁷Kur iponna oko, an amironi, tim ber igam doga, pien atye i can.

¹⁸Nyiggo baŋa, me ikonya, tim ber ikwanya oko ciŋ okworra.

¹⁹Yin gire iŋeo kite ame onywara kede luŋ, kede lewic areco luŋ ame gin omia, dok daŋ iŋeo okworra luŋ.

²⁰Ayet ame gin yeta kede omio cunya oballe oko, omio doŋ atye acalo ŋat obolo tonnere piny oko. Ŋattoro akono kica make i koma, mom nen kadi acel, jo moro akono kwe cunya mom nen kadi acel.

²¹Akaka miya cem a myero acam, gin omia acamo cam ame oonyo iye kwir, ka apenyo pii me amata, gin olunyo miya koŋo awac.

²²Mi mejagi ame tye i nyimgi, lokere dok owic me mokogi; ecubangi ame oyalo iye Obaŋa olokere odoko boo me mokogi.

²³Mi waŋgi cid oko me kur onen piny; mi pyergi bed myel amyela.

²⁴Cor akemoni luŋ i komgi, tyek akemoni agwa wokki komgi.

²⁵Myero imi kemagi doŋ nono aboŋo ŋattoro ame bedo iye, kur imi ŋattoro bed iye kadi acel.

²⁶Pien gin omedde wuno dano ame yin doŋ ityeko keto can i kome, dok omedde keto can ameda i kom ame yin doŋ ityeko keto awano i komgi.

²⁷Medde keto can aketa i komgi pi balgi, kur ikwany kop i wigi kadi acel.

²⁸Mi nyiŋgi jwa oko i buk a jo akwo, kur imi co nyiŋgi i buk a jo a kitegi atira.

²⁹Cite an rem kede can ocira oko; Ama Obaŋa, tim ber ilara ite keta malo.

³⁰An abino pako nyiŋ Obaŋa, kede wer; abino dworo nyiŋe kun apwoe.

³¹Pwocca-nono bino yomoro cunye ame kato twon oko, akadi twon ame tuŋe tye kede lwete.

³²Tim ber imi jo ame owuno nen, bedo i yomcuny; wunjo ame woro Rwot, cunywu bino dwogo.

³³Rwot gire winyo koko a jo ame piny oloo, dok daŋ cunye mom cao jo mere ame otweo i buc.

³⁴Polo kede lobo ducu myero pake, nam kede ginnoro luŋ ame woto i tyene.

³⁵Pien Obaŋa bino laro jo ame bedo i Cion, dok daŋ bino dok gero boma luŋ me Juda; omiro mere bino bedo kuno, ote gamo bedo meggi,

³⁶Itino omiro mere bino leyo doko meggi, dok jo luŋ ame mare bino bedo iye.