Read lango Jabuli 7 Bible Online

Jabuli 7 - lango bible

Jabuli 7

¹Wer kumo a Daudi ame en owero baŋ Obaŋa i kom Kuc dano me Benjamin. Ama Rwot Obaŋana, an gire ariŋo alaro baŋi, larra i ciŋ okworra ame aryemo yora, me ikonya,

²naka mio gin kikilo an oko calo eŋatu, kun owaa otera teŋe aboŋo ŋattoro ame romo lara i ciŋgi.

³Ama Rwot Obaŋana, ka ce atimo man, ka ce an atimo balloro,

⁴ka ce atimo balloro baŋ awota pi culo gin arac ame en otimo i koma, onyo ka ce ayako jami akworra aboŋo tyen kopporo.

⁵Mi okworra ryem yora maka oko i yo, migi oreta piny oneka oko, oweka piny kuno ame doŋ ato oko.

⁶Tim ber iya doŋ malo akemo, Ama Rwot, ya ilweny okworra ame obino i koma agwa wok-ki; ya doŋ malo, Ama Rwot Obaŋana, pien yin en iciko pi nino me ŋolo kop.

⁷Mi lwak rok luŋ cokere baŋi guri dyere, me yin icak loyogi kun ibedo i kabedoni malo.

⁸Rwot gire en a ŋolo kop a rok luŋ, ŋol doŋ koppa, Ama Rwot, kun icuŋ i kiteni atira, dok kun ilubo kite ame cunya ler kede.

⁹Tim ber imi tim a jo areco gik oko, cite myero imi jo a kitegi atira mok atek, yin Obaŋa ame kiteni atira, ame iŋio cuny jo kede tamgi.

¹⁰Kwot me geŋo koma tye baŋ Obaŋa, en laro jo ame cunygi atira.

¹¹Obaŋa en aŋolkop ame ŋolo kop kakare, en Obaŋa ame mio kop loo jo a kitegi reco nino ducu.

¹²Ka ce dano mom oŋut, Obaŋa bino pako pala me lwenyere; en doŋ otyeko telo tol atero mere oko;

¹³Jami lwenyere areco meicel, en doŋ atyeko yiko oko luŋ, owaŋo doŋ leb atero mere oko i mac,

¹⁴Nen ba, atim tim arac, tamo tam arac i cunye, tim arac te doŋ bedo do ŋo i cunye, te cako kobo kop me goba baŋ jo.

¹⁵Kunyo twon burroro atut, en ikome dok te rette i bur ame ekunyo-nono,

¹⁶Timere araccono lokere dok i wie kene, dok timere me bwami daŋ lokere waŋe.

¹⁷An gira abino pwoyo Rwot pien kite atira dok daŋ abino wero wer me pako nyiŋ Rwot, ame en Ŋat Amalo Meicel.