Read lango Jabuli 71 Bible Online

Jabuli 71 - lango bible

Jabuli 71

¹An gira ariŋo alaro baŋi, Ama Abana; kur imi lewic maka ba;

²Lara dok ikonya pi kiteni atira; cik yiti me iwiny kwacca, dok daŋ ilarra.

³Tim ber ibed kidi atek me larrena, dok ibed twon cel atek meicel me gwokka, pien yin en ibedo kidi kede cella ame ocel atek.

⁴Ama Obaŋana, tim ber ilara i ciŋ tim areco, lara i ciŋ jo a mom ŋolo kop kakare, dok ame gin jo ager meicel.

⁵Pien genna luŋ tye i komi, Ama Rwot, acako genni i kare ame pwod an atin,

⁶An rik acako bedo i gen i komi cakere ame rik pwod onywala anywala, yin daŋ en ame rik ikwanya iyi totta kan ame rik abuto iye. An gira abino medde paki kare ducu.

⁷An onwoŋo abedo gin ame jo apol wuro meicel, ento yin en ame ibedo ka larrena atek.

⁸Wer me paki mom rwenyo i doga, aketo kwogo i komi nino i nino.

⁹Tim ber kur ibola oko i kare ame doŋ atyeko ti; kur daŋ iweka ata i kare ame tekona doŋ odoko agoro,

¹⁰Pien okworra kare luŋ bedo poro kop i koma, jo ame mito neka, cokere karacel me poro kop i koma.

¹¹Kun okobo ni, “Obaŋa doŋ otyeko weka oko ata; ryeme wunu me imake wunu oko, pien ŋattoro a myero lare mom doŋ tye.”

¹²Ama Obaŋa, kur ibed abor keda; Ama Obaŋana, tim ber iru bino konya.

¹³Mi lewic mak jo ame tye ka dota, dok ame otyeko tekona oko; Mi jo caagi, dok lewic adwoŋ meicel daŋ makgi, gin jo luŋ ame mito keto can ikoma.

¹⁴Cite an gira abino medde bedo gen nakanaka, kun daŋ amedde paki apaka.

¹⁵Abino medde tuco ticcoro luŋ atira ame yin ibedo tiyo, abino tuco daŋ pi tic ame itio me lawk jo nino ducu, pien welgi dwoŋ meicel, ame kato ŋec ame an atye kede oko.

¹⁶Abino bedo rabo pi tic adoŋo me awura ame Rwot Obaŋa obedo tiyo, kiteni atira keken en ame an abino bedo pako.

¹⁷Ama Rwot Obaŋa, yin gire ibedo konya cakere i kare ame pwod atidi, pi mannono, pwod abino bedo tuco ticcogo me awura luŋ ame yin itio.

¹⁸Pi mannono ba, kadi ati ame lwar doŋ obuko i wia, kur iweka kadi acel, Ama Obaŋa, tuno ka atyeko rabo pi twerri baŋ lwagi jo me kare luŋ,

¹⁹Tekoni kede kiteni atira, doŋ otyeko tuno naka malo i polo, Ama Obaŋa. Yin doŋ ityeko timo jami mogo adoŋodoŋo meicel, kara ŋa ame oŋomo pori kede, Ama Obaŋa?

²⁰Yin en ame icwao can kede rem adwoŋ meicel baŋa, ento yin dok ibino miya teko; dok daŋ yin ibino wota oko piny i te bur atut, ibino wota idwogo an kannaler.

²¹Ibino miya abedo twon lo moro adit akato kit ame yam abedo kede con; dok daŋ ibino kweyo cunya.

²²Dok daŋ abino paki kede naŋa opuk, pien yin ibedo Obaŋana ame genne, abino wero wer me paki, kun agoo naŋa opuk, Ama yin Ŋat Acil me Icrael.

²³Abino redo atek meicel i yomcuny, i kare ame atye ka wero wer me paki; abino paki daŋ i tipona luŋ ame yin ityeko laro.

²⁴Abino medde tuco ticcoro luŋ atira ame yin ibedo tiyo me konyo jo, cakere odiko naka otyeno, pien can kede lewic doŋ otyeko makogi oko, gin jo ame onwoŋo mito keto can i koma.