Read lango Jabuli 72 Bible Online

Jabuli 72 - lango bible

Jabuli 72

¹Man wer ame Culeman owero. Pwony abaka i ŋolo kop atira calo yin, Ama Obaŋa, dok imi wot abaka nywak kedi kiteni atira.

²Myero kite atira en ame loc i ŋolokop a joni i dok daŋ ŋolli ocan kop atira.

³Mi kiddi okel kuc baŋ joni, wii tur-gu okel kite atira,

⁴Abaka myero ŋol kop a jo ame tye i akina joni kakare, dok myero lar jo ame piny oloo, kun turo loc a jo ame wunogi oko.

⁵Mi loccere perakino acalo ceŋ kede dwe, pi runi kede runi,

⁶Mi jo jole acalo kot ame cwe i wi lum ame ojwero, acalo kot ame ŋido bido lobo otwo.

⁷Mi kite atira nya medde ameda i kare me loccere, kuc daŋ bed tye i lobo mere nakanaka, tuno i kare ame dwe doŋ mom tye,

⁸Mi lobo ame en loo cakere i dog nam tuŋŋi tuno kede tuŋ ocele, cakere i kulo adwoŋ tuno kede i agikki lobo,

⁹Mi okworrere bin ryebere piny i nyime me wore, jo a lwenyo i kome, bin mulo amula i nyime.

¹⁰Mi abaka me Tarcic kede abaka a jo ame bedo i cula nam bin gel ocorogi baŋe, dok obakki me Cebar kede me Eciopia, kel motgi baŋe.

¹¹Obakki luŋ myero bin ryebere piny i nyime, dok rok luŋ daŋ myero bed jo ame tio ticcere.

¹²En maro ŋat me piny oloo ka ce okok baŋe, konyo daŋ ocan kede ŋattoro ame tye aboŋo ŋat ame konye.

¹³Pien kica mako i kom jo agoro kede i kom jo ame piny oloo, dok daŋ laro kwo a jo ame piny oloo,

¹⁴En lakoro kwogi i ciŋ jo ame wunogi kede otim tim me bwami, kwogi pire tek baŋe meicel.

¹⁵Mi kom abaka bed ayot nakanaka, dok imi mie jabu ame okelo i Ceba.

¹⁶Mi jo bed kwayo pire nakanaka, kun daŋ olamme winyo kare ducu, Mi cam cek adwoŋ meicel i lobo mere, naka i wi kiddi malo, mi ginnoro luŋ ame cek iye bed bala en ame cek i Lebanon, dok jo bed dwoŋ atek meicel i boma ame tye i te loccere, kun pol meicel calo lum.

¹⁷Mi nyiŋ abaka perakino nakanaka, mi nyiŋe bed rwo nakanaka kite ame ceŋ ri kede. Mi jo luŋ ka alamo gum, lam i nyiŋe, kun rok luŋ lwoŋe ni, lo a kome winy.

¹⁸Rwot Obaŋa me Icrael myero pwo, ame en keken en ame tio gin me awura.

¹⁹Nyiŋe me kwogo myero bed pako nakanaka, kwogo mere myero rom lobo luŋ aluŋa! Amen dok Amen!

²⁰Kwac a Daudi wot a Yece ogik kan.