Read lango Jabuli 73 Bible Online

Jabuli 73 - lango bible

Jabuli 73

¹Man wer ame Acap owero. Ateteni, Obaŋa gire ber baŋ jo a cunygi ler, i kom jo ame cunygi cil.

²Aco an, tyena otwomere ame onwoŋo doŋ aceggi poto, tyena onwoŋo doŋ ceggi acega i cer.

³I kare ame nyeko omaka i kom jo ame wakere, kede i kare ame aneno otim tim areco tye alony alonya.

⁴Pien gin gigi mom owinyo kit remmoro kadi acel, komgi yot dok daŋ pwot apwota.

⁵Gin mom ocalo jo ocele ame can bino poto i komgi, mom daŋ otye ka goyogi calo jo ocele.

⁶Mannono omio awaka en ame tye acalo tigo ŋutgi, tim me kolo te bedo acalo boŋogi me aruka.

⁷Yikgi me timo gin areco mollo amola i cunygi calo moo, tam me miŋo en ame dwoŋ i cunygi.

⁸Gin cwako gin arac i kop areco keken, cunygi yom ayoma i tim me wuno jo ocele,

⁹Naka Obaŋa ame tye malo twalli gin okobo kop arac i kome, kop a ya i doggi twero ketti jo ame tye i wi lobo cik.

¹⁰Mannono omio jo lunyo pakogi, kun jo ye kopporo luŋ ame gin kobo.

¹¹Gin okobo i cunygi ni, “Obaŋa kara twero ŋeyo i yore aŋo; Obaŋa mara meicel, ŋeo ginnoro luŋ bo?”

¹²Nen ba, mannono en kite ame ocan bedo kede, kun lonyo medde ameda i ciŋgi.

¹³Cite an ame abedo gwoko cunya bedo acil, kun daŋ alwoko balloro luŋ i ciŋa, an kom abedo yelle nono.

¹⁴Pien obedo yella nino ducu, kun daŋ opwoda nino i nino odiko.

¹⁵Kono onwoŋo akobo amannono, kono abwolo ikwai ame obino nywalo i kare me anyim.

¹⁶Ento atemo i tekona ducu me niaŋ gin omio man tye ka timere, anwoŋo ni tek ame mom aromo niaŋ iye,

¹⁷tuno naka i to acil ame oworo iye Obaŋa, ate doŋ niaŋ iyi imuŋ Obaŋa i kom otim tim areco.

¹⁸Ateteni, remo onwoŋo iketogi kan apwot meicel, ame obedo cer acera iye, omio gin luŋ ote poto oko i can.

¹⁹Gin luŋ rik ote tum oyotoyot meicel, can ame mio jo lworo rik te jwerogi tyekogi oko.

²⁰Jo-nono gire calo lek ame ka dano ocoo i waŋ nino rwenyo oko i wie, ame ka ico i waŋ nino calgi rwenyo oko i wi kede tammi.

²¹I kare ame cunya ocwer meicel, ame akemo omio par ocira oko,

²²onwoŋo adoko amiŋ ame mom aromo tamo ginnoro kadi acel, kun atimere i nyimi calo lee.

²³Kadi bed amannono, an gira kare luŋ atye i ciŋi, yin imako ciŋa tuŋ cem.

²⁴Yin en ame itela kede tam ame ibino miya, waŋŋoro i agikki ibino jola i kabedoni me kwogo,

²⁵Kara ŋo ocele ame dok tye pira i polo, mom yin keken? Mom dok tye ginnoro i lobo kan ame an amito ame kati,

²⁶Koma kede cunya twero doko agoro, cite yin Obaŋa en ame imia tekcuny, dok yin gire en ame ibedo gin ame opoka ame abino gwoko atwal.

²⁷Nen ba, ŋat ame bor abora kedi, bino to oko, pien yin ibino jwero jo luŋ ame mom geni,

²⁸Aco an gira, bedo ceggi kedi yin Obaŋa en ame berra, an gira ariŋo alaro baŋi, yin Rwot Obaŋana, me wek abedo rabo pi ticcoro luŋ ame yin itio.