Read lango Jabuli 74 Bible Online

Jabuli 74 - lango bible

Jabuli 74

¹Man wer ame Acap owero. Ama Obaŋa, piŋo kara ibolowa oko atwal? Piŋo imio akemoni duny i kom rommini ame itye ka kwayo?

²Po pi lwakki ame yam yin iyero pi lwakki cakere con, jo ame yam ilakoro oko i can me bedo megi yin ikomi, Po pi kidi me Ci on kan ame yam yin ibedo iye.

³Doki i kabedo man ame doŋ oballe oko odoco-ni; okworo otyeko balo ginnoro luŋ ame tye i odi.

⁴Okworo oredo kun owoo ilelo kan ame yam owori iye, oŋabo benderagi i doggola malo, ame nyuto ni kannono doŋ odoko meggi.

⁵Gin onen calo opaa bao ame tye ka toŋo yen i lee iyi buŋ,

⁶Bao luŋ ame, yam opao aber, otoŋo oko piny, obabalo oko i lee kede anyul.

⁷Ocwinyo mac, ote waŋo oko odi acil, Ama Obaŋa, opyelo-gu odi acil ame yam jo wori iye, kun omuko apama mere oreto oko piny.

⁸Okobo i cunygi kengikengi ni: Obino nekogi otyekogi oko ducu, obino daŋ waŋo kabedo acil ducu i lobowa, kan ame yam gin oworo iye Obaŋa.

⁹Anennoro ame yam poyo wiwa mom doŋ tye, adwarpinnyoro daŋ mom doŋ tye, dok daŋ mom tye ŋattoro i akinawa ame ŋeo kare ame can man bino ri kede,

¹⁰Ama Obaŋa, okwor bino bedo yeti naka awene ba? gin obino bedo cayo nyiŋi nakanaka bo?

¹¹Piŋo kara ikwero konyowa oko? Pi ŋo idolo ciŋi idwoko iŋei kaka ryeyo me konyowa?

¹²Aco kono yin Obaŋa ame ibedo abakana, cakere con meicel; yin en ibedo tiyo ticcogo me laro dano i wi lobo.

¹³Pi twer ame yin itye kede omio yin ipoko nam i dul aryo, ite nyonyobo wi leyi ame bedo i nam oko,

¹⁴Iŋiŋinyo daŋ wi Leviatan oko, ite bolo kome baŋ leyi ager me acamagi.

¹⁵Imio pii opelo iyi akoŋ kede i kulo, imio pii odwono oko i nam adoŋo.

¹⁶Yin daŋ gire en ame ilo dyeceŋ kede dyewor, dok yin en ame iketo cen kede dwe i kabedoni.

¹⁷Yin en imoko waŋ apokki me lobo, dok daŋ yin en ame iyiko kare me oro kede kare me cwir.

¹⁸Aman doŋ ba, Ama Rwot, koŋ ipoyo kite ame okworwa yeti kede, gin obedo jo amiŋ ame yeti nononono, kun mom olwori kadi acel,

¹⁹Kur ijal kwo a joni i ciŋ leyi ager, wii myero kur wil oko atwal i kom lwakki ame can odio.

²⁰Poyo cikereni ame rik icikere kede kedwa, tim me byemi tye i kabedo luŋ acol ame tye i lobowa-ni,

²¹Kur imi lewic mak jo ame otye ka nyono oko piny, mi ocan kede jo ame piny oloo pak nyiŋi.

²²Ya malo, Ama Obaŋa, ipid pidoni, wii kur wil i kom ayet ame jo amiŋ cai kede kare ducu,

²³Wii kur wil i kom redo me akemo ame okworri redo kede atek wok-ki, woo okworri ame tye ka medde ameda kare i kare.