Read lango Jabuli 77 Bible Online

Jabuli 77 - lango bible

Jabuli 77

¹Baŋ adwoŋ wer: Man wer Acap owero. Akok atek meicel baŋ Obaŋa, akok i dwon aloŋo baŋ Obaŋa, me en winy kokona.

²I kare ame atye i can, an ayenyo Obaŋa; dyewor luŋ an abedo taŋo ciŋa baŋe kun mom aol, cite mannono luŋ mom mio cunya kwe.

³Aparo pi Obaŋa, kun acur meicel; abedo lwodo kop i kome i cunya, ate doko agoro oko,

⁴Yin igeŋa nino oko, cunya-gu bedo myel amyela ame mom aromo kop.

⁵Cunya dok riŋo cen i kare ame okato, ate poyo mwakki mogo ame doŋ okato iŋec.

⁶Abedo tamo tam atut meicel dyewor, cunya lwodo kop kun apenyere kenakena ni:

⁷“Obaŋa bino kwera nakanaka? kica mom bino make i koma kadi acel?

⁸Marrere ame mom lokere doŋ ogik oko bo? cikere ame en rik ocikere kede kedwa doŋ ogik oko bo?

⁹Onyo Obaŋa wie owil awila me tima kica bo? Onyo akemo mere doŋ oloc oko ame kica mom dok romo make?”

¹⁰Dok ate kobo ni, “Gin ame doŋ cwero cunya twatwal ene, Twer ame Obaŋa Amalo Meicel tye kede doŋ olokere oko.”

¹¹Abino poyo tic ame Obaŋa obedo tiyo; abino gire poyo ticcogo me awura ame itio mwaka okato.

¹²Abino lwodo kop i cunya kun aparo ticcoro luŋ ame yin itio, ate poyo ticci mogo adoŋdoŋo ame ibedo timo.

¹³Ama Obaŋa, ginnoro luŋ ame yin itimo cil, obaŋa mene adok dwoŋ calo Obaŋawa?

¹⁴Yin ibedo Obaŋa ame tio ticcogo me owura, ityeko nyuto twerri oko kannaler oko i akina rok ducu.

¹⁵Yin rik ilakoro joni i tekoni, ame gin obedo ikwae a Yakobo kede me a Yucepu.

¹⁶Kare ame pii me nam oneni, Ama Obaŋa, kare ame pii me nam oneni, lworo omakogi, pii atut ame tye i nam te cako tagere oko.

¹⁷Pol ocoro pii piny; piny te mor i pol atek meicel, lutkot te meny menyo kabedo ducu.

¹⁸Lutkotti te mor i yamo ajuru, omor te menyo lobo luŋ, lobo te yeŋere, jo ame bedo iye daŋ komgi te myel.

¹⁹Yo ame yin ilubo onwoŋo beo i dye nam, yin rik ite ŋolo twon dye nam ame pii mere tut meicel; kadi amannono kan ame tyeni onyono onwoŋo mom romo nen.

²⁰Rik itelli joni yo acalo ŋat akwayo rommi, kun imio Muca kede Aron gwokogi.