Read lango Jabuli 78 Bible Online

Jabuli 78 - lango bible

Jabuli 78

¹Man wer Acap owero. Cik yitwu, iwiny wunu pwonnya, wun jona; cik yitwu iwiny wunu kop ame aya i doga.

²An abino pwonyowu i pwony me ryeko, abino tuco koppogo opono me kare acon,

³gigi mogo ame wan owinyo dok oŋeo, ame kwariwa rik otittiwa.

⁴Wun daŋ myero kur imuŋŋi wunu itinowu, cite myero ititi wunu lwagi jo me kare luŋ ame obino nywalo, gigi mogo me kwogo ame Rwot otimo, karacel kede twer ame en tye kede, kede gigi mogo me awura ame en otio.

⁵En rik omio cik baŋ jo Icrael, dok omio daŋ koppogo me caden baŋ ikwae a Yakobo, ame rik en ociko kede kwariwa, ni myero pwony kede otinogi;

⁶me wek lwagi jo ame alubowa daŋ ŋe, itino ame mom ru onywalo, gin daŋ ka odoŋo ote tito baŋ itinogi.

⁷Mannono bino miyo gin daŋ obedo kede gen i kom Obaŋa, kun wigi mom wil oko i kom gin ame Obaŋa otimo ento olubo cik Obaŋa.

⁸Gin myero mom obed calo kwarigi, lwagi jo ame maro jem ame ŋutgi nwaŋ, ame rik gin obedo jo ame maro jem meicel, kun daŋ mom owinyo cik Obaŋa.

⁹Itino Epraim omako atero me lwenygi, ote loko ŋegi oko i kare me lweny.

¹⁰Gin rik mom ogwoko cikkeregi kede Obaŋa, ento okwero lubo cik a Rwot oko.

¹¹Wigi owil oko i kom tic ame en otio, akadi taŋo mogo ame en obedo nyuttigi.

¹²Obaŋa rik otio ticcogo me awura i nyim kwarrigi, i lobo me Miciri, i bar me Joan.

¹³En rik omio pii opokere i dul aryo gin te beo i dyere, en omio pii ocuŋ tuŋŋi i tuŋŋi calo pem.

¹⁴Dyeceŋ en obedo telo nyimgi kede pol, eka dyewor te bedo mennyigi yo kede mac.

¹⁵En obaro kidi i dye tim, pii te wukere iye pirgi ni wol wol,

¹⁶Omio pii omolo i lela, pii iye te mol calo pii i kulo.

¹⁷Ento gin omedde ameda i timo bal i nyime, ojem-gu baŋ ŋat Amalo Meicel i tim,

¹⁸Obedo temo Obaŋa i cunygi, kun openyo cam ame cunygi mito.

¹⁹Obedo kobo kop arac i kom Obaŋa kun okobo ni: Obaŋa twero miyowa cam i tim kan?

²⁰Kun kono enobaro kidi pii te molo iye, En twero miyowa cam-kan, kun mio daŋ riŋo baŋ jo mere?

²¹I kare ame Obaŋa owinyo kopginono, akemo omake, omio te cwinyo mac me waŋo Yakobo, akemo mere te lyeto meicel i kom Icrael;

²²pien gin doŋ onwoŋo mom geno Obaŋa, dok mom ogeno ni Obaŋa tye kede teko me larogi.

²³Kadi bed amannono en rik okobo kop baŋ pol ame tye i polo, doggola luŋ me polo te yabere oko;

²⁴Manna te corre piny iya iye me acamagi, Obaŋa omiogi cam ame oya i polo.

²⁵Mannono omio dano te camo cam ame omalaika camo, Obaŋa te miyogi cam adwoŋ ame okato mitigi oko.

²⁶En te cwayo yamo i polo ame oya i tuŋ kide, pi teko en dok te cwayo yamo ame oya i tutuŋ anyarolum,

²⁷Omio riŋo oduny i wigi malo calo apua, kede winnyi apol meicel calo kwoyo me dog nam,

²⁸Omiogi oony piny i dye kemagi, i kabedo luŋ ame gin obedo iyenono,

²⁹Gin ocamo ote yeŋ, pien en omiogi gin ame cunygi onwoŋo mito.

³⁰Cite i kare ame gin pwod pe ru ocobo mitigi, ame mom ru oyeŋ, ame riŋo ame ocamo-nono daŋ pwod tye i doggi,

³¹akemo te mako Obaŋa meicel i komgi, te neko jo mogo ame onwoŋo tek meicel i akinagi, ojwero twoni jo mogo ame en oyero ayera i akina jo Icrael.

³²Kadi amannono, gin pwod omedde ameda i timo bal, mom oye kadi acel gigi mogo me awura ame en obedo timo.

³³Mannono en omio karegi-naca okato oyotoyot calo yamo, kwogi te tum atuma ame mio jo lworo meicel.

³⁴Kare ame en oneko jo mogo akinagi, jo odoŋ te cako yenye, oŋut ote yenyo Obaŋa cunygi ducu,

³⁵Gin te cako poyo ni Obaŋa en obedo kan atek me alaragi, Obaŋa Amalo Meicel en obedo ŋat alakorogi.

³⁶Cite kop ame gin kobo oduro ka goba keken, obedo kobo kop me goba i nyime.

³⁷Cite gin onwoŋo mom mare i cunygi ducu, mom daŋ ogwoko cik Obaŋa.

³⁸Cite pien Obaŋa akica, kica te make i kom lwakkere, en te weko balgi oko, mom te nekogi, en obedo juko akemo mere tyen apol meicel, mom oye ni akemo mere tugere ducu.

³⁹Obaŋa te poyo ni gin obedo dano keken, ocalo yamo ame woto mom dok lokere dwogo cen,

⁴⁰Gin obedo jem i kome tyen apol meicel, omio akemo obedo make i tim kuno,

⁴¹Obedo teme-gu teretere, kun oroko Ŋat Acil me Icrael.

⁴²Wigi onwoŋo owil oko i kom teko mere, kede i kom kare ame gin olakorogi i kom ciŋ okworgi;

⁴³kare ame en otio gigi mogo me awura i Miciri, kede taŋo mogo ame en obedo timo i bar me Cion,

⁴⁴En oloko pii odoko remo, omio jo i kuno mom romo mato pii i kulogi.

⁴⁵Ocwao i akinagi lwaŋi apipim, ame te bedo kayogi, dok te cwayo daŋ ogwalogwali apipim me yelogi.

⁴⁶Omio omor ocamo cam i potogi oko, bonyo daŋ te mwodo cam ame gin obedo lole kede oko.

⁴⁷Omio pee oonyo olokgi oko piny, kede ŋico obalo olamgi oko,

⁴⁸Omio daŋ pee oneko dokgi oko, lutkot daŋ ocecelo rommigi oko.

⁴⁹Owuko akemo mere luŋ i komgi, omiogi can apek meicel, te cwayo lwak omalaika i akinagi me nekogi,

⁵⁰Mom ojuko akemo mere kadi acel, mom oye laro kwogi i to, omio too edeke onekogi meicel.

⁵¹Oneko itino kao luŋ me Miciri, ame gin onywalo i tekogi me agege, i kema me Kam

⁵²En te telo jo mere calo rommi, otelo nyimgi i tim calo leyi me paco,

⁵³Otelogi i kuc, kun mom tye ginnoro ame gin olworo, ento pii me nam te mwonyo okworgi oko.

⁵⁴En te terogi naka i lobo mere acil, i wi kidi ame en olo pi teko mere,

⁵⁵Oryemo rok ocele luŋ ame onwoŋo tye i nyimgi, en opokkigi lobo ame omiogi me alea me bedo meggi, te miyo atekere me Icrael bedo kema okworgi.

⁵⁶Cite gin obedo temo Ŋat Amalo Meicel, kun daŋ ojem i kome, kun daŋ mom oye lubo koppere me caden,

⁵⁷ento olokere oko teŋe ote bedo timo gin ame kwarigi obedo timo, obedo minne amina calo akud atero ame ogom.

⁵⁸Pien obedo roke omio akemo omake, pi woro cal jogi i kabedo mogo ame otiŋere malo, obedo miyo nyeko make pi cal apaagi.

⁵⁹I kare ame Obaŋa owinyo akemo omake meicel, cunye te wuko jo Icrael odoco.

⁶⁰Obaŋa te weko kabedo mere oko ame tye i Cilo, kema ame rik en bedo iye i akina lwak,

⁶¹en te miyo tero candukkere me twer iyi opii, kede kema me kwogo mere i ciŋ okwor.

⁶²Akemo omake meicel i kom jo mere ame en oyero, te jalogi oko me aneka i pala lweny,

⁶³Omio mac owaŋo awobegi otyeko oko ducu, anyiragi mom doŋe winyo wer me nyom.

⁶⁴Olamdog-gu ote neko oko i pala lweny, kun mongi mom doŋ kokogi.

⁶⁵Rwot te co calo ŋat ame ocoo i nino, calo loo atek ame omer i koŋo olok ame tye ka redo.

⁶⁶En te ryemo okworrere dwoko oko cen, te miyo twon lewiccoro a mom romo gik makogi,

⁶⁷En te kwero kema a Yucepu oko, mom te yero atekere a jo Benjamin,

⁶⁸En te yero atekere a jo Juda, kede kidi me Cion ame onwoŋo en maro,

⁶⁹Te gero kabedo mere acil ocuŋ iguŋ calo polo, ocibo ocuŋ atek ikiŋ calo lobo.

⁷⁰En te yero Daudi me bedo amiro mere, okwanyo Daudi i yo kwayo rommi.

⁷¹Olwoŋe i akina rommi ame pwod dot, me bino kwayo jo mere ame gin jo a Yakobo, okete me bedo abaka a jo me Icrael.

⁷²Daudi te bedo kwayogi i cuny aler, dok otelogi daŋ i twon diro meicel.