Read lango Jabuli 80 Bible Online

Jabuli 80 - lango bible

Jabuli 80

¹Man obedo kop me Acap. Cik yiti iwinywa, Ama yin akwat a jo Icrael, yin ame rik ibedo telo Yucepu acalo rommini. Yin ame ibedo i wi kom locci i kom okerubi ame ryeny menyo piny,

²i nyim atekere a jo Epraim, Benjamin, kede Manace. Nyut tekoni, me ilarwa.

³Dwogowa cen baŋi, Ama Obaŋa, mi waŋi oryeny omenywa me olarre,

⁴Ama Rwot Obaŋa me mony, akemo bino bedo maki naka awene ba, Ama Obaŋa, i kom lwakki ame kwai.

⁵Yin rik imiowa ocamo pig waŋwa calo cam me acama, imiowa pig waŋwa poŋ ikopo moro ni omati.

⁶Imio jo ame bedo i ŋetwa obedo cayowa arac meicel, kun okworwa bedo nyerowa anyera kengi kengi.

⁷Ama Obaŋa me mony, dwokwa baŋi, mi waŋi oryeny omenywa, me olarre,

⁸Yin rik ikelo olok iya i Miciri, iryemo rok ocele oko eka ite pito.

⁹Rik iyiko lobo itere obedo aber me doŋi, lwite te donyo apol meicel piny.

¹⁰Tipo mere te wumo wi kiddi luŋ, jaŋe te buŋere wumo twoni yen cedar adoŋodoŋo meicel.

¹¹Jaŋe te bunere tuno naka i nam, pote te tuno naka i kulo adwoŋ.

¹²Piŋo kara dok imuko apama mere oko, ame mio jo luŋ ame beo i ŋete pwono nyige?

¹³Kul ame bedo i buŋa obalo atek meicel, dok leyi luŋ me tim daŋ camo.

¹⁴Koŋ dok ilokere ba, Ama Obaŋa me mony, bol waŋi piny i polo kuno, me koŋ inen,

¹⁵Tim ber ipar pi olokki, pien mannono obedo yatti ame yin en ipito.

¹⁶Gin owaŋo i mac ote toŋo daŋ oko piny, nengi akemo me oto oko,

¹⁷Ket ciŋi i kom joni ame iyero, igwokgi, obedo wot a dano ame yin en imioo oko atek piri.

¹⁸Mannono bino miyo mom dok olokere odok cen oweki, gwokwa obed kwo, wan obino woro nyiŋi,

¹⁹Ama Obaŋa me mony, dwokwa baŋi, mi waŋi oryeny omenywa, me olarre.