Read lango Jabuli 82 Bible Online

Jabuli 82 - lango bible

Jabuli 82

¹Man wer Acap owero Obaŋa doŋ obedo oko i kommere icokere ame tye i polo, en tye ka ŋolo kop i akina obaŋe obaŋe ocele ame ogure dyere, kun kobo ni,

²“Mom ibino ŋolowunu kop kakare pi kare a rom mere, ŋolo kop ame odworo kede otim tim areco?

³Ŋol wunu kop kakare pi jo agoro kede itino kic, mi wunu jo atye i can kede jo a piny olo bed itwero ame oromo kwoogi.

⁴Lar wunu jo agoro kede jo ame piny oloo, largi wunu oko i ciŋ jo areco.”

⁵Mom otye kede ŋeccoro kadi niaŋŋoro, gin owoto gigi ata i piny acol; acakki me te lobo ducu tye ka yeŋere,

⁶An akobo ni, “Wun obaŋe, wun luŋ ibedo wunu itino a Ŋat Amalo Meicel;

⁷kadi bed amannono, wun daŋ ibino to wunu acalo dano, ibino rette wunu piny acalo rwottoro ata.”

⁸Ya malo, Ama Obaŋa, me iŋolli lobo kop; pien rok luŋ obedo megi.