Read lango Jabuli 83 Bible Online

Jabuli 83 - lango bible

Jabuli 83

¹Man wer Acap owero. Ama Obaŋa, kur iliŋ iti ba, kur ibed mot ikuc kun iliŋ iti, Ama Obaŋa,

²Koŋ inen okworri tye kajem ajema; jo ame dagi, wigi doŋ odoko adoŋo oko.

³Otye ka yiko yikkkogo me imuŋ i kom rokki, otimo-gu tim me idwali i kom joni ame yin igwoko.

⁴Gin okobo kop i akinagi kengi kengi ni, “Bye wunu, me otyek wunu rok man oko; me nyiŋ jo Icrael kur dok po pire atwal.”

⁵Gin luŋ gigi oporo kop man i cunygi acel, dok daŋ ocikere me lweny i komi.

⁶Gin jo Edom kede jo Icmael, jo Moab kede jo Agri.

⁷Jo Gebal, jo Ammon, kede jo Amalek, jo Piriciti kede jo ame bedo i Turo.

⁸Jo Acuria daŋ onwoŋo oribere kedgi, i kom ikwae a Lot gin en obedo dul mony atek meicel.

⁹Timgi kite ame rik itimo kede jo Midian, kite ame itimo kede Cicera, kede Jabin i ŋet kulo me Kicon,

¹⁰Ame rik inekogi oko i En-dor, ame rik odoko calo woyo dyaŋ ame oonyo i poto,

¹¹Mi odoŋegi ame oworo bed calo Oreb kede Jeb, rwodegi te bedo acalo Jeba kede Jalmuna,

¹²ame rik gin okobo ni, “Ogam wunu bar kwat Obaŋa oko me bed megwa.”

¹³Ama Obaŋana, migi obed calo apua ame yamo ajuru kolo, calo cuŋ kal ame yamo kolo te tero oko.

¹⁴Kite ame mac waŋo kede buŋ, kite ame mac waŋo kede wi kiddi ka obolo iye,

¹⁵yin daŋ myero ibin iryemgi oko amannono acalo twon yamo moro ame akodo atek, kun imio yamo ajuru ame akodo kodo ager ame myelo komgi.

¹⁶Mi lewic makgi, Ama Rwot, tuno ka gin ocako lwoŋo nyiŋi.

¹⁷Mi lewic makgi, dok imi cunygi bed poto apota nakanaka, migi oto, to me lewic.

¹⁸Migi oŋe ni yin keni en ame i Rwot, yin en ibedo Ŋat Amalo ame loo wii lobo ducu.