Read lango Jabuli 85 Bible Online

Jabuli 85 - lango bible

Jabuli 85

¹Baŋ adwoŋ wer. Man wer ame ikwae a Kora owero. Ama Rwot, kica yam omaki i kom loboni; imio jo a Yakobo obedo dok i kuc.

²Yin yam doŋ igonyo bal a lwakki oko, rik doŋ ijwa balgi luŋ aluŋa.

³Rik akemoni okwe doŋ oko komgi, rik iloko cunyi, akemoni alyet wok ca te doŋ kwe oko,

⁴Dok idwogowa baŋi, Ama Obaŋa ame larowa, cunyi myero kur doŋ bed waŋ i komwa.

⁵Akemo bino bedo maki i komwa nakanaka bo? Akemoni bino ri atwal naka i kare a jo me kare ducu?

⁶Mom ibino miyo cunywa dok dok i komi, me wan joni obed kede lelo i komi?

⁷Nyuttiwa marri a mom lokere, Ama Rwot, dok ilarwa daŋe.

⁸Wek koŋ awiny gin ame Rwot Obaŋa bino kobo, pien en bino kobo kop me kuc baŋ jo mere, baŋ jo mere ame gene, ame lokere baŋe i cunygi ducu.

⁹Ateteni, en gire oyikere me laro jo ame wore, me kwogo bed i lobowa.

¹⁰Mar a mom lokere kede gen bino ribere karacel, kite atira kede kuc bino mote kun onoto lemgi.

¹¹Gen ame dano tye kede bino tuno malo kun ya i lobo; kite atira bino bolo waŋe piny kun tye i pol.

¹²Nen ba. Rwot bino miyo gin ame ber, dok lobowa bino ceko cam.

¹³Kite atira bino telo nyim Obaŋa, me yubo yo pire.