Read lango Jabuli 86 Bible Online

Jabuli 86 - lango bible

Jabuli 86

¹Man kwac ame Daudi okwao kede Obaŋa. Winy kwacca, Ama Rwot dok iwiny doga, pien atye i can, dok amito ni ikonya.

²Gwok kwona, pien an amari kede cunya ducu, lar amirona ame gena.

³Yin ibedo Obaŋana, kica myero maki i koma, Ama Rwot, pien an akok gira baŋi keken ceŋ iyul.

⁴Mi cunya bed ayom, Ama Rwot, pien an gira acwao kwacca baŋi, kun akwao i cunya ducu.

⁵Pien yin giri iber, dok igonyo bal, Ama Rwot, pien marri a mom lokere dwoŋ baŋ jo ame kok baŋi.

⁶Cik yiti, Ama Rwot, iwiny kwacca, winy kokona ame abako kede doga baŋi.

⁷I kare ame atye kede peko, an gira akok baŋi, pien yin igamo kwacca.

⁸Mom tye ŋattoro ame rom kedi i akina obaŋe ocele, Ama Obaŋa, dok daŋ mom tye ticcoro ame rom i tic ame yin itio.

⁹Rok luŋ ame yin iketogi bino bino baŋi, ote bino ryebere piny i nyimi, Ama Rwot, ote daŋ pako nyiŋi.

¹⁰Pien yin idwoŋ dok itimo jami mogo me awura meicel, yin keni en ame ibedo Obaŋa.

¹¹Pwonya me aŋe kite ame yin imito ni an abed kede, Ama Rwot, me alub atenini, yik cunya me alwori.

¹²Apwoi kede cunya ducu, Ama Rwot Obaŋana, dok abino keto kwogo i komi nakanaka,

¹³Pien marri a mom lokere dwoŋ meicel i koma, yin ilaro kwona i bur atut me Ceol.

¹⁴Ama Obaŋa, jo ame onywar oero lweny i koma, lwak jo areco ame timo tim me byemi mito neka, gin mom oparo piri kadi acel i ginnoro luŋ ame gin otimo.

¹⁵Ento yin i Rwot, ibedo Obaŋa ame akica, ame maro jo ducu, akemo mom maki oyot, dok marri a mom lokere kede genni dwoŋ meicel,

¹⁶Lokere inena, dok kica daŋ myero maki i koma, mia tek, dok daŋ ilara, pien an amironi, ame atio kite ame yam totta otio kede baŋi.

¹⁷Nyuta ginnoro, Ama Obaŋa, ame nyuto berri, me lewic mak jo ame daga, ka gin bino neno ni yin Rwot doŋ ityeko kweyo cunya, dok ikonya.