Read lango Jabuli 88 Bible Online

Jabuli 88 - lango bible

Jabuli 88

¹Man wer ame ikwae a Kora owero. Baŋ adwoŋ wer. Ama Rwot Obaŋana, an akok baŋi nino i nino pi kony; anaka dyewor daŋ akok baŋi.

²Ye kwacca tun i nyimi, cik yiti iwiny kokona,

³Pien peko doŋ onua oko, omio kwona doŋ ceggi acega i to.

⁴An doŋ okwana i akina jo ame woto piny i bur; an a dano ame tekona moro doŋ mom,

⁵Acalo doŋ ŋat ame oweko i akina jo oto, acalo doŋ jo ame onekogi ote doŋ wekogi buto i lyelgi, atye doŋ i akinajo ame wii doŋ owil oko i komgi, pien doŋ atye kan abor ame mom romo akonya.

⁶Yin doŋ ityeko bola oko ite bur piny, kannacol dok atut meicel,

⁷Akemoni doŋ pek atek meicel i koma, amwonyere doŋ oko i bwo me akemoni.

⁸Imio owotena en ame odoko jo me lweny i koma, adoko doŋ twon ginnoro arac meicel i nyimi. Otwea aboŋo yo moro ame doŋ aromo ya kede malo.

⁹Waŋa doŋ oballe meicel pi kumo, an gira akok baŋi nino ducu, aryeo ciŋa ataŋo baŋi.

¹⁰Yin itio gigi mogo me awura pi jo oto bo? Tipo a jo oto dok ya malo me paki?

¹¹Marri a mom lokere daŋ otito pire i lyel, onyo kiteni atira otito pire i lobo a jo oto?

¹²Gigi mogo me awura ame yin itio ŋeye daŋ kannacollaca, onyo kony ame yin imio me laro dano bino nen i lobo ame wii jo wil oko iye?

¹³Ama Rwot, an gira akobo baŋi me konya; nino ducu odiko acwalo kwacca i nyimi.

¹⁴Piŋo kara ibola oko, Ama Rwot? Piŋo ipona oko ame mom aromo neni?

¹⁵Cakere ame atidi rem ocira oko ame doŋ aceggi to, abedo kanyo tim ame itimo i koma ame kella lworo, adoko doŋ agoro odoco.

¹⁶Akemoni doŋ owuma oko, lweny ame ibedo lweny kede ikoma omio lworo doŋ otyeko tekona oko,

¹⁷Ogura doŋ dyere calo abwal spii ame amol, ocorre i koma gin luŋ karacel.

¹⁸Imio doŋ owotena ame amaro kede jo ame ceggi keda owuna meicel, piny acol en ame doŋ tye acalo awotta.