Read lango Jabuli 89 Bible Online

Jabuli 89 - lango bible

Jabuli 89

¹Man obedo wer a Etan me doggola Ejira. Abino wero wer me pako marri a mom lokere, Ama Rwot, abino rabo pi gen ame yin itye kede baŋ lwagi jo me kare luŋ.

²Pien aŋeo ni marri a mom lokere perakino nakanaka, gen ame itye kede daŋ tye ocuŋ ikiŋ calo polo.

³Yin ityeko kobo ni, “An doŋ atyeko cikere oko i ŋat ame ayero, akwoŋo daŋ doŋ oko baŋ amirona Daudi, kun akwoŋo ni,

⁴‘Abino moko ikwai bedo nakanaka, dok abino gero kom me locci perakino nakanaka i kare alwagi jo me kare luŋ.’ ”

⁵Polo myero pak gigi mogo ame yin itio me awura, Ama Rwot, dok daŋ myero ower wer me pako gen ame yin itye kede, icokere a jo meri acil.

⁶Kara ŋa ame dok tye i polo malo ame dok otwero poro kede Rwot? Ŋa i akina jo luŋ ame rom kedi, Ama Rwot?

⁷Mom yin ibedo Obaŋa ame olworo i cokere a jo acil, yin idwoŋ meicel dok yin iyiliyili meicel ame ikato jo luŋ ame oguri tuŋŋi kede tuŋŋi.

⁸Ama Rwot Obaŋa me mony, ŋa ame twerrere rom i megi? Yin igenne i yore luŋ, Ama Rwot.

⁹Yin ilo naka bi-amwonyi me nam ame tagere, ka bi-amwonyi me nam otugere, yin imio liŋ oko,

¹⁰Yin rik inyono Rakab oko piny calo ŋat ame onyono kom dano ame oto, ikeketo okworri oko ducu pi tekoni.

¹¹Polo kede lobo luŋ obedo megi; wii podo luŋ kede ginnoro luŋ ame tye iye, yin en iketogi.

¹²Yin en iketo lobo luŋ, i tuŋ malo kede i tuŋ piny, Tabor kede Kermon, pako nyiŋi meicel i yomcuny.

¹³Yin itye kede twer adwoŋ meicel; tekoni dwoŋ, ciŋi tuŋ cem otiŋere malo.

¹⁴Kite atira, kede ŋolo kop atira, tye piny i te kom me locci mar kede gen nen i kom ginnoro luŋ ame itimo,

¹⁵Jo ame ŋeo wer i dwon aloŋo tye kede winyo, ame woto i nyimi kun olubo kicani, Ama Rwot.

¹⁶Jo-nono bino bedo i yomcuny piri nino ducu, gin bino bedo dworo kiteni atira.

¹⁷Pien yin en ibedo kwogogi kede tekogi; pien pi berri mio tekowa medde ameda.

¹⁸Yin en ibedo kwotwa, Ama Rwot, yin ŋat acil me Icrael, imiowa abaka.

¹⁹I kare acon rik ibedo lok omironi i waŋ lek, kun ikobo baŋ jo ageni ni, “Aketo tok me kwogo i kom dano ame tye kede tek, amio ŋat ame ayero i akina lwak obedo i wi kom loc.”

²⁰Anwono Daudi ame obedo amirona, atyeko daŋ doŋ kwere okome bedo abaka,

²¹Tekona bino bedo i kome nakanaka, twer ame an abino miye, mio en bino bedo atek.

²²Okworrere mom bino bwolle, otim tim areco mom bino loye.

²³Abino nyono okworrere oko piny i nyime, jo ame dage, abino neko oko luŋ.

²⁴Genna kede marra a mom lokere bino bedo i kome, abino miyo teko mere medde ameda me loyo okworrere i nyima.

²⁵Abino miyo loccere medde naka i dog nam, tuŋ ocele bino tuno i kulo adwoŋ,

²⁶En bino lwoŋo nyiŋa kun kobo ni, “Yin i Pappa, yin Obaŋana; yin en i bedo ka larrena atek ame ageno.”

²⁷Abino miyo en bedo acalo atin kao, twon abaka moro adwoŋ ame loo obakki luŋ me wi loboni.

²⁸Marra a mom lokere abino gwoko pire nakanaka, dok cikerena ame aketo bino cuŋ ikiŋ pire.

²⁹Abino miyo akware en ame bedo i wi kom me loc, dok abino moko kom me loccere bedo atwal calo polo.

³⁰“Ka ce ikwae bino kwero lubo cikka oko, ote bedo kun mom olubo gin ame an aciko;

³¹ka ce gin bino turo cikka, kun mom olubo cik ame amiogi,

³²bino miyo apwodogi kede abiro pi balgi; can adwoŋ meicel bino poto i komgi.

³³Cite mom abino kwanyo marra a mom lokere i kome, mom abino weko gwoko gen ame atye kede i kome.

³⁴Mom abino turo cikerena kadi acel, mom daŋ abino loko kopporo ame yam doŋ atyeko kobo.

³⁵Doŋ atyeko kwoŋ i nyiŋa acil icel keken, mom abino kobo kop me goba kadi acel baŋ Daudi.

³⁶Ikwae bino bedo tye kare ducu, kom loccere bino perakino nakanaka calo ceŋ ame ryeny nyima.

³⁷Bino moko atek ikiŋ calo dwe nakanaka, bino bedo atek calo polo ame opette malo.”

³⁸Cite aman yin ityeko kwero dok daŋ cunyi otyeko cayo, akemo omaki meicel i kom abaka ame iyero.

³⁹Ituro cikereni ame rik icikere kede amironi, ibolo tokkere me loc oko i wie piny iyi apua.

⁴⁰Apama luŋ ame onwoŋo tye me geŋŋe doŋ ityeko muko oko, cellere ame ogero atek iloko odoko wi obur.

⁴¹Jo ame beo i ŋete yako jami luŋ ame tye iye, odoko doŋ gin ame owote mere atye i ŋete ŋalo i jo aŋala.

⁴²Imio okworrere en ame doŋ tye ka loye, imio cuny okworrere doŋ yom atek meicel.

⁴³Nen ba, imio pala me romo mere odoko doŋ okuku oko, imio en dok mom romo cuŋ i nyim okworrere me lweny.

⁴⁴Ikwanyo abiro me loc oko i ciŋe, kom me loccere daŋ icoro ireto oko piny.

⁴⁵Imio kare me kwo mere odoko doŋ acecek meicel, imio lewic-gu doŋ ociro oko,

⁴⁶Ibino pono pi kare arom mene, Ama Rwot? Ibino bedo pono amannono nakanaka bo? Kara akemoni bino bedo lyel calo mac naka awene ba?

⁴⁷Ama Rwot, po pi kare me kwo a dano, po ni yin ityeko keto dano pi to.

⁴⁸Ŋa kara ame twero perakino kun mom obilo to? Ŋa ame twero laro kwo a dano i bur to?

⁴⁹Kara marri a mom lokere me kare aconni doŋ tye kwene ba, gen ame yin itye kede ame rik ikwoŋo pire baŋ Daudi ni?

⁵⁰Ama Rwot, po kite ame jo tye ka cayo kede amironi; nen kite ame ayet arok luŋ doŋ ocira kede,

⁵¹Ama Rwot, nen kite ame okwor tye ka ŋalla kede, kede kite ame otye ka ŋalo abaka ame yin ityeko yero, kannono luŋ ame en woto iye.

⁵²Rwot gire myero pwo nakanaka! Amen dok Amen!