Read lango Jabuli 9 Bible Online

Jabuli 9 - lango bible

Jabuli 9

¹Baŋ adwoŋ wer: Man wer a Daudi ame owero. Abino pwoyo Rwot kede cunya ducu, abino rabo pi jami luŋ me awura ame en otio.

²Cunya bino bedo yom kun alelo meicel piri, abino gira wer kun apako nyiŋi, Yin Amalo Meicel.

³Okworra bino lokere dok cen, a me komgi myel amyela ote rereta to oko i nyimi.

⁴Pien yin iŋolo koppa atira i wi kom locci, kan ame bedo iye aŋolkop ame ŋolo kop kakare.

⁵Yin ityeko juko rok, dok ijwero jo areco oko, yin doŋ ijwao nyiŋgi oko atwal i wi lobo,

⁶Okworra doŋ oto otum oko atwal, bomagi daŋ doŋ ikeketo oko luŋ, mom doŋ opo, pirgi kadi acel.

⁷Cite Rwot gire bedo i wi kom me loc nakanaka, en doŋ otyeko keto kom me ŋolo koppere oko,

⁸En loo lobo i kite atir, en bino ŋolo kop a rok luŋ arorom.

⁹Rwot en kan atek ame laro jo ame piny oloo, kan atek me alara i kare me can.

¹⁰Jo ame ŋeo nyiŋi bedo kede gen i komi, pien yin gire mom ikwero jo ame wori, Ama Rwot.

¹¹Wer wunu wer me pako Rwot ame loo Cion! Rab wunu pi gin ame en otio baŋ rok luŋ!

¹²En acul kwor meremo a jo ame oneko, po daŋ pirgi, wie mom wil i kom koko a jo ame can opoto i komgi.

¹³Kica myero omaki i koma, Ama Rwot! Koŋ inen can ame jo a daga oketo i koma, Yin en ilara i kom to,

¹⁴me awer wer me paki i yore ducu, i kabedo me ŋolo kop i nyim jo me Jerucalem, dok daŋ alel pi kite ame ilara kede.

¹⁵Rok apapat doŋ orette oko i bur ame gin i komgi okunyo, tyengi omoko oko i owic ame gin ociko,

¹⁶Rwot doŋ otyeko miyo nyiŋe oŋeye oko, pi ŋolo kop atira otim tim areco moko dok iyi owic ame gin ikomgi ociko.

¹⁷Otim tim areco luŋ bino donyo piny i lyel me Ceol, naka rok luŋ ame okwero Obaŋa.

¹⁸Pien wi Obaŋa mom bino wil i kom ocan, dok gen ame ocan tye kede mom bino to nono.

¹⁹Ya malo, Ama Rwot! Kur imi dano loi. Cok rok luŋ i nyimi me iŋol kopgi.

²⁰Mi lworo makgi, Ama Rwot! Myero gin oŋe ni gin obedo dano adana.