Read lango Jabuli 90 Bible Online

Jabuli 90 - lango bible

Jabuli 90

¹Man kwac a Muca ame obedo dano Obaŋa. Yin gire i ka-larrewa, Ama Rwot, cakere con i con.

²Ame mom ru oketo kiddi, onwoŋo yin giri doŋ Obaŋa, kun lobo kede wi podo luŋ pwod mom, onwoŋo yin giri doŋ itye.

³Iloko dano doko apua, kun ikobo ni, “Dok giri iyi apua wun itino a dano.”

⁴Mwaka tutumia rom aroma i nino aworo baŋi, onyo romo aroma i caa acel keken me dyewor.

⁵Ijwero dano oko, kun imiogi orwenyo calo lek, kun calo lum ame lot odiko.

⁶Odiko lot te doŋo, otyeno ner, te two oko,

⁷Akemoni ojwerowa otyekowa oko, wan cunyi odiowa meicel.

⁸Balwa luŋ tye i nyimi, anaka balwa luŋ ame ŋattoro mom ŋeo, gin luŋ tye kannaler i nyimi.

⁹Kare me kwowa iŋolo ogik acecek pi akemoni, kwowa rwenyo calo lwio.

¹⁰Kare me kwowa gik ka i mwakki pyerabiro nono, aco ka tekowa pwod tye te tuno pyeraboro nono, akadi bed amannono, mwakkinono luŋ bedo me can keken, dok daŋ mom ru tum, eka wan ote rwenyo oko.

¹¹Ŋa kara ame niaŋ teko me akemoni? Ŋa kara ame niaŋ waŋ cunyi ame mio twero bedo kede lworo kakare?

¹²Pwonywa kwano kare me kwowa, me obed i cuny ame ryek.

¹³Lok cunyi, Ama Rwot! Tim omironi kica! Myero onen can pi kare arom mene ba?

¹⁴Kwe cunywa oyot ba i mar meri a mom lokere, me ower i yomcuny pi kare me kwowa luŋ.

¹⁵Miwa obed i yomcuny ame rom aroma i can ame oneno, a rom aroma i mwakki ame obedo kede peko.

¹⁶Miwa wan omironi onen teko me ticci, me ikwaewa nen kwogoni.

¹⁷Rwot Obaŋa myero mi berrere obed i komwa; omok ticwa luŋ ame wan otio, omok ticcoro luŋ ame wan otio.