Read lango Jabuli 92 Bible Online

Jabuli 92 - lango bible

Jabuli 92

¹Man wer ame owero iceŋ cabit. Pwoyo Rwot ber, wero wer me pako nyiŋi daŋ ber, Ama yin Amalo Meicel.

²Rabo pi marri a mom lokere odiko ducu, kede kobo kite ame igenne kede otyeno ducu, daŋ ber,

³kun orabo i naŋa kede gita, kun otye ka lubo dwon naŋa opuk.

⁴Pien ticci mia yomcuny, Ama Rwot, tic ame yin itio mia awero wer me lelo,

⁵Tic ame yin itio malo meicel, Ama Rwot, tammi daŋ tut meicel.

⁶Ŋat a tammere goro mom twero ŋeyo, lo amiŋ mom twero niaŋ iye.

⁷Mom twero ŋeyo ni kadi bed jo areco lot calo lum, onyo jo a timo tim areco bedo jo atek, pwod gire obino tyekogi odoco.

⁸Ento yin giri ibedo malo nakanaka, Ama Rwot,

⁹pien okworri gire bino rwenyo oko, otim tim areco luŋ obino keto atata,

¹⁰Yin imia atiŋo wia malo, kite ame jobi tiŋo kede wie malo, iweo-gu moo anyen i wia.

¹¹An doŋ aneno gira i waŋa kite ame ireto kede okworra, dok daŋ awinyo kede yita koko a jo ame omito lweny keda.

¹²Jo a kitegi atira doŋo calo otit, odoŋo aboco calo yen cedar me Lebanon.

¹³Gin obedo i ot a Rwot calo yen opito, ame doŋo i dyekal Obaŋawa,

¹⁴ame nyako nyiggi naka i kare me tiogi, kare luŋ nwoŋo pige dwoŋ kun mom ner.

¹⁵Mannono me nyuto ni Rwot gire ŋolo kop atira, en obedo kidi me gwokerena, kan ame timmoro arac mom iye.