Read lango Jabuli 94 Bible Online

Jabuli 94 - lango bible

Jabuli 94

¹Yin Obaŋa ame culo kwor, Ama Rwot, yin Obaŋa ame culo kwor, ryeny ba imeny piny!

²Ama aŋolkop me lobo, ya ba malo, mi jo a wakere gin ame opore pirgi.

³Jo areco bino bedo yon naka awene, gin bino bedo yon naka awene ba?

⁴Kop a ya i doggi luŋ obedo me acae keken, otim tim areco luŋ bedo wakere awaka,

⁵Gin odio joni, Ama Rwot, owuno jo ame obedo joni ikokome.

⁶Gin oneko mon ame coggi oto, kede jo ame bedo i lobogi, oneko daŋ anaka itino kic.

⁷Gin otamo ni Rwot gire mom nenogi, ni Obaŋa a Yakobo mom gire paro.

⁸Myero iniaŋ wunu ba, wun ame tamwu goro, Ibino doko wunu aryek awene, wun jo amin?

⁹Ŋat ame oketo yit dano en a mom winyo kop bo? Ŋat ocweo waŋ dano en mom neno piny bo?

¹⁰Ŋat ame pwonyo orok mom romo goyogi bo? Ŋat ame omio jo ŋeo piny, en ikome ŋeccere mom bo?

¹¹Rwot gire ŋeo ginnoro luŋ ame dano tamo, en ŋeo ni tamgi luŋ calo yito,

¹²Ŋat ame yin igoo, tye kede winyo, Ama Rwot, kede ŋat ame yin ipwonyo kede cikki,

¹³me miye weo i kare me can, tuno waŋ ame doŋ okunyo bur a jo areco.

¹⁴Rwot gire mom bino weko jo mere ata, mom bino jalo jo ame obedo mere ikokome,

¹⁵pien oŋolkop bino dok ŋolo kop kakare, jo luŋ a cunygi atir te doŋ cako lubogi.

¹⁶Ŋa kara ame bino cuŋ tuŋ baŋa me lweny i kom jo areco? Ŋa kara ame bino cuŋ i ŋeta me bino lweny i kom otim tim areco?

¹⁷Kono Rwot mom okonya, kono ti pona mom onian dok i bur oliŋ iti,

¹⁸Kare ame atamo ni tyena ocer, yin onwoŋo itye ikonya kede marri, Ama Rwot.

¹⁹Kare ame par opoŋ i cunya, yin ikweo cunya ate bedo kede lelo,

²⁰Itwero notte oloc areco, jo ame loko gin abalo kuc doko cik?

²¹Ocokere karacel me neko ŋat a kite atira, oŋolli ŋat a mom i bal kop me to,

²²Ento Rwot en obedo cel atek ame an agwokkere i yie, Obaŋana obedo kidi ame an ariŋo alaro,

²³En bino wiro balgi-nono dwoko i komgi, en bino jwerogi oko pi timgi areco. Rwot Obaŋa bino jwerogi oko.