Read lango Jabuli 95 Bible Online

Jabuli 95 - lango bible

Jabuli 95

¹Bye wunu, me ower wunu baŋ Rwot: me cunywa bed yom i kom teko me larrewa

²Bin wunu i nyime kede pwoc; kun opake wunu kede wer me yomcuny.

³Pien Rwot Obaŋawa, en Obaŋa ame dwoŋ, en obedo Rwot adwoŋ ame kato jogi ducu,

⁴En gire loo wi podo ducu; cakere i piny tuno kede naka i wi kiddi malo,

⁵En loo gire anaka nam-gu ame en otio; pien ciŋe daŋ en ocweo lobo.

⁶Biye owore wunu, oguŋ wunu piny; orum wunu conwa i nyim Rwot oketowa,

⁷ Pien en obedo Obaŋawa; wan obedo jo ame en gwoko, kede rommi ame kwo i ciŋe. Cik wunu yitwu iwiny wunu koppere tin,

⁸Kur imi wunu cunywu bed anwaŋ; acalo rik i Meriba kede i tim i Macca, i ni no ca.

⁹Kare ame kwariwu rik otema; gin rik opima ote neno ticca.

¹⁰Cunya rik te kwerogi pi mwakki pyeraŋwen; kun akobo ni, “Rok man obedo rok ame cunygi rac, dok gin mom otio gin ame amito.”

¹¹En omio rik akwoŋo i kare ame akemo omaka; ni gin mom bino donyo i loba ame abino miyogi iye weo.