Read lango Jabuli 96 Bible Online

Jabuli 96 - lango bible

Jabuli 96

¹Wer wunu wer anyen baŋ Rwot; wer wunu baŋ Rwot, wun loba ducu!

²Wer wunu baŋ Rwot, pak wunu nyiŋe; rab wunu nino ducu ni en olarowu.

³Rab wunu pi kwogo mere baŋ rok ducu, kede tic ame en otio me awura baŋ jo luŋ,

⁴Pien Rwot dwoŋ meicel, myero pake meicel; myero lwore akato obaŋe ocele luŋ.

⁵Pien obaŋe a rok ocele obedo cal apaa keken, ento Rwot oketo polo.

⁶Kwogo kede twer luŋ tye baŋe; teko kede lelo tye kan ame en bedo iye.

⁷Pak wunu Rwot, wun atekere ducu ame tye i lobo, pak wunu kwogo mere kede teko mere.

⁸Pak wunu nyiŋ Rwot ame obedo me kwogo; kel wunu motwu baŋe i ot me wore.

⁹Wor wunu Rwot i boŋo acil; komwu myero myel i nyime, wun jo me loba ducu.

¹⁰Titti wunu rok ducu ni Rwot en abaka, lobo gire doŋ oketo ocuŋ atek odoco, mom dok romo yeŋere kadi acel;

¹¹Lel wunu, wun polo kede lobo; mor ba, yin nam kede jami ducu ame tye i yie;

¹²poto daŋ myero lel, kede jami luŋ ame tye iye! Yen ame tye i buŋ luŋ bino wer i yomcuny,

¹³i nyim Rwot, pien en abino, en abino me bino ŋolo kop i lobo. En bino ŋolli i jo luŋ kop atira en ŋolo kop kun luba ateni mere.