Read lango Carokop 1 Bible Online

Carokop 1 - lango bible

Carokop 1

¹Magi carokop a Culeman, wot a Daudi, abaka me Icrael.

²Carokop magi konyo dano me ŋeyo ryeko kede pwony aber, kede niaŋ koppogo ame te koppere tut meicel.

³Dok twero pwonyo dano me bedo aryek i ginnoro luŋ ame en tio, kun kite atira, ŋolo kop atira, dok tero jo luŋ arom aroma.

⁴Pwonyo ŋat a mom i ŋeccoro doko dano ame ŋeo piny, mio jo atino bedo jo ame ŋeo gwoko kitegi i gin ame otimo.

⁵Konyo ŋat aryek me medo pwonyere mere, dok mio ŋat ame niaŋ atut ŋeo gin ame myero etim,

⁶me niaŋ te kop me carokop kede gigi mogo ame okobo kop i komgi, kede kop a jo aryek, karacel kede icina mogo ame oceko,

⁷Dano cako bedo kede ŋec, ka ce lworo Rwot, jo amiŋ mom paro pi bedo kede ryeko, dok okwero pwonyere oko.

⁸Atinna, winy gin ame pappi pwonyi kede, kur daŋ ikwer winyo pwony a totti;

⁹pien pwonygi twero yubo kiti bedo aber, calo tok ame iketo i wii, onyo tigo ame iruko i ŋuti me miyi nen aber.

¹⁰Atinna, ka ce jo areco obwoli, kur iye ba,

¹¹ka ce gin okobbi ni, “Biye iwot kedwa, me owot oki dano-moro onek oko olib lo a mom i bal onek oko,

¹²me omwonygi akwo kite ame lyel mwonyo kede jo, omwonygi alutu kite ame to mwonyo kede dano,

¹³Nen kit jami luŋ me wel bino doko megwa, jami ame oyako bino poŋ i udiwa oko;

¹⁴biye inotte kedwa, wan luŋ obino noto limwa karacel.”

¹⁵Atinna, kur inywak yo kedgi, kur ilub yorgi kadi acel.

¹⁶Kodi jo-nono tyengi dwir me wot timo bal, komgi mit ata i onyo remo a jo.

¹⁷Konyo kara ŋo me ciko tol, kun winyo ame iciko tye aneni?

¹⁸Kodi jo-nono obuto okio remogi kengi, gin olibo gigi kwogi kengi,

¹⁹Mannono en kite a jo luŋ ame yako jami a jo tetek timgi miogi orwenyo kwogi.

²⁰Koŋ iwiny wunu ba lwoŋo a ryeko i dye yo; dwone loŋo aloŋa i cuk-gu:

²¹naka atot i wi cel malo; naka i dogcel luŋ ame woto boma en kobo koppere iye ni,

²²“Kara ibino mito wunu bedo amiŋ kittono pi kare a rom mene wun jo ame mom i ŋeccoro? Ibino bedo lelo wunu i ŋalo jo naka awene ba, wun oŋal jo kede jo ame dag ŋec?

²³Winy wunu koppa ka ce ajukowu; nen ba, an abino tito kop ame tye i cunya luŋ, abino miyowu iŋeo wunu tamma.

²⁴Pien an alwoŋowu, wun ite kwero wunu winyo oko, aryeo-gu ciŋa, cite ŋattoro mom oketo cunye iye.

²⁵Ikwero winyo wunu gin ame apwonyowu kede luŋ, mom iye wunu ni ajukwu kadi acel;

²⁶Pi mannono ba, an abino nyerowu anyera ka can opoto i komwu, abino yetowu ayeta kare ame lworo doŋ ocirowu oko;

²⁷kare ame lworo tye awunowu calo yamokot, ame can doŋ abino i komwu calo yamo ajuru, kun itye wunu i rem kede cwercuny adwoŋ,

²⁸Kare-nono en ame obino cako lwoŋa kede, cite mom gira abino gamo kadi acel; obino yenya atek meicel, cite mom gire obino nwoŋa,

²⁹Pien gin gigi mom omito bedo kede ŋec, dok mom oyero bedo kede lworo i kom Rwot.

³⁰Mom igamo wunu pwonnya moro kadi acel, kun mom iye wunu ni ajukwu kadi acel.

³¹Mannono bino miyogi obilo adwoggi me yogi-nono, obino bedo i wi timgi areco-nono.

³²Pien jo a mom i ŋeccoro to pi lubo yo a mom omito, gin oto pi yomcunygi a mom oparo kede piny.

³³Cite ŋat ame bino winyo koppa, bino bedo i gin ame gwoke, bino bedo aber aboŋo ginnoro ame en lworo.”