Read lango Carokop 10 Bible Online

Carokop 10 - lango bible

Carokop 10

¹Carokop a Culeman. Awobi aryek yomoro cuny pappere, ento en amiŋŋere cwero cuny tottere.

²Lonyo ame inwoŋo i yore arac konnyere pe, ento kite atira lari i to,

³Rwot mom weko kec neko ŋat a kite atira, ento en kwero ŋat arac, pe nwoŋo gin ame yie mito.

⁴Wackom kelo can, ento tiyo tic atek kelo lonyo.

⁵Atin aryek coko cam oko i poto ka ocek, ento en ame nino anina i kare me kac, kelo lewic i kome kene.

⁶Rwot mio gum baŋ ŋat a kite atira, ento kop ame atim tim arac kobo wumo timmere me kolo oko.

⁷Ŋat a kite atira kome i gum pien opo pire, ento ŋat arac nyiŋe top, te rwenyo atwal.

⁸Lo aryek i cunye mako cik, ento amiŋo ame kobo kop miŋomiŋo bino to.

⁹Dano ame cunye ler mom lworo ginnoro, ento jo a kitegi ogom mom twero kanne atwal.

¹⁰Ŋat ame mimio waŋe atata kelo ayela, ento ŋat ame juko dano kannaler kelo kuc.

¹¹Kop ame jo a kitegi atira kobo obedo waŋ pii me kwo, ento kop ame atim tim arac kobo wumo timmere me kolo oko.

¹²Dagere kelo lweny, ento mar wumo kit bal ducu.

¹³Ŋat aniaŋ kobo kop me ryeko, ento ŋat a wie mom tio mito ka lut.

¹⁴Ŋat aryek bedo ŋat a tye kede ŋec oromo, ento ŋat amiŋ kobo kop ame kelo can i kome.

¹⁵Alonyo geno lonyo mere acalo boma atek ame en riŋo laro, ento can tero acan i to.

¹⁶Timo gin atira tero dano i kwo, ento tim arac medo bal ameda.

¹⁷Ŋat awinyo pwony nwoŋo tye i yo me kwo, ento ŋat ame mom ye ni juke rwenyo arwenya.

¹⁸Ŋat ame kano adage i cunye kobo kop goba, ŋat ame kwoto jo en amiŋo.

¹⁹Kop apol apola bal mom rwenyo iye, ento ŋat aryek mom duro kop apol.

²⁰Ŋat a kite atira, kop i doge calo ryal ame olio, ento tam a ŋat arac konnyere nok meicel.

²¹Kop a ŋat a kite atira pwonyo jo apol, ento omiŋo to i kwiya pinygi.

²²Gum ame Rwot mio, mio dano bedo alonyo, kun mom medo iye ginnoro akelo cwercuny,

²³Timo gin arac calo tuko baŋ amiŋo, ento tim me ryeko kelo yomcuny baŋ ŋat a niaŋ.

²⁴Gin ame ŋat arac lworo, en ame kelle peko, ento gin ame dano a kite atira mito, omie,

²⁵Yamo ager ka akodo, kolo dano arac oko, ento ŋat a kite atira moko gire atwal.

²⁶Awackom rom aroma i koŋo awac i dog, kede yito adonyo i waŋ, baŋ jo luŋ ameare tiyo ticgi.

²⁷Bedo i lworo i kom Rwot mio dano perakino, ento awaka a ŋat arac gik iŋwet,

²⁸Ŋat a kite atira cobo gennere i yomcuny, ento ŋat arac geno bwoo ŋor.

²⁹Rwot en ame ika larre atek, baŋ ŋat ame tio gin a atye atira, ento neko otim tim areco aneka.

³⁰Ŋat a kite atira bino bedo i kuc, ento jo areco obino puto oko i lobo.

³¹Ŋat a kite atira kobo kop me ryeko, ento ŋat akobo kop me goba obino ŋolo lebe oko.

³²Ŋat ame kite atira kobo kop ame jo pwoo, ento ŋat arac kobo kop ogom cutu.