Read lango Carokop 11 Bible Online

Carokop 11 - lango bible

Carokop 11

¹Rwot dag mijan me cero jo, ento en pwoo kidi ame pimo jami kakare.

²Wakere kelo lewic, cite mwolo woto karacel i ryeko.

³Lercuny en ame telo jo a cunygi atira, ento jo ame kitegi ogom to pi kitegi-nono.

⁴Lonyo mom konyo ginnoro i kare me akemo Obaŋa, ento tim atira twero laro dano i kare me to.

⁵Tim atira ame ŋat a mom i balloro timo mio yore cuŋ atira, ento atim gin arac poto pi timmere-nono.

⁶Tim atira ame ŋat a cunye atira timo twero lare, ento abwol jo doko opii pi woro mere.

⁷Gen ame ŋat arac tye kede to nono, jo a mom woro Obaŋa geno bwoo ŋor.

⁸Ŋat a kite atira bwot oko i can, eka ŋat arac te lunyo leyo kakare.

⁹Ŋat a mom woro Obaŋa balo awottere i kop i doge, ento bedo kede ŋec en ame laro jo a kitegi atira.

¹⁰Ka ce ŋat a kite atira alonyo jo i boma luŋ lelo; ka jo a kitegi reco oto, jo luŋ wo i yomcuny.

¹¹Ka gum opoto i kom jo a kitegi atira, jo i boma luŋ bedo atek meicel; aco jo areco balo boma abala i kop ame gin kobo.

¹²Ŋat ame mio awottere doko dano ayot i akina jo, wie mom tio; ento ŋat a niaŋ atut liŋ gire mot.

¹³Ŋat ame rimo piny i kwokwoto jo, tuco i muŋ a jo ocele, ento ŋat ame agen i cunye, kano kop me i muŋ.

¹⁴Ka ce atel mom, jo poto oko, ento kan ame omi-tam pol iye, kuc bedo i lobo-nono,

¹⁵Ŋat ame cikere me culo banya amyere bino paro icen, ento ŋat a mom cuŋ i jo atata tye aber.

¹⁶Dako ame akica jo woro, ento adwar kolo nwoŋo lonyo ame omao amaa.

¹⁷Dano ame akica konyere kene, ento ŋat ager kelo awano i kome kene,

¹⁸Jo ame timo gin a mom atira nwoŋo ocaragi a konnyere pe, ento jo ame timo gin atira nwoŋo ocara ikokome,

¹⁹Ŋat olido bedo i kite atira bino kwo, ento ŋat ame ryemo yo gin arac bino to,

²⁰Rwot dag ŋat ame tammere ogom, ento cunye yom i kom jo ame balloro mom i kitegi.

²¹Bed ame iŋeo ni atim gin arac mom bino bwot a mom oketo cannoro i kome, ento jo ame kitegi atira obino laro oko,

²²Dako amwonya meicel a mom ŋeo poko gin aber kede gin arac, rom aroma alem jabu ame oketo i um puno.

²³Jo a kitegi atira mito ka gin aber keken; ento gin ame jo areco mito kelo ka akemo.

²⁴Jo mogo ame mio limgi i yomcuny lony medde ameda, aco jo mogo ame odur lunyo dok medde ameda i bedo acan.

²⁵Ŋat ame cunye yom i konyo jo, lim medde i ciŋe, ŋat ame konyo jo ocele, jo daŋ konye.

²⁶Ŋat ame adur i cammere jo ceno acena, ento ŋat ame cato cam i ciŋe jo lam me gum.

²⁷Ŋat ame yenyo gin aber i cunye luŋ jo pwoo, gin arac gire bino i kom jo ame yenyo,

²⁸Ŋat ame oketo gennere i kom lonyo bino ner calo lum, ento ŋat a kite atira bino bedo aber calo pot yat adyaka.

²⁹Ŋat ame yelo jo me ode mom bino nwoŋo ginnoro, aco ŋat amiŋ bino bedo opii a ŋat aryek.

³⁰Kite atira obedo yat ame ya iye kwo, kwero lubo cik rwenyo kwo a dano arwenya.

³¹Ka ce ŋat a kite atira nwoŋo mottere i lobo kan, kara doŋ jo areco kede obalo bino nwoŋo can a rom mene?