Read lango Carokop 12 Bible Online

Carokop 12 - lango bible

Carokop 12

¹Ŋat ame mito ni pwonye nwoŋo mito medo ŋeccere, aco ŋat a mom ye ni juke bedo dano amiŋ nakanaka,

²Rwot pwoo ŋat ame kite ber, ento en ŋolo kop loo jo ame paro pi timo gin arac.

³Dano mom cuŋ atek pi timo gin arac, ento ŋat a kite atira rom aroma i yat ame lwite mom putte.

⁴Dako aber kelo kwogo i kom cware ento dako ame kelo lewic i kom cware calo bur ame balo cogo kom cware,

⁵Ŋat a kite atira tamo tam aber, ento ŋat a kite rac mio tam ame bolo dano i mac.

⁶Jo ame kitegi reco kobo kop ame kelo to, ento jo a kitegi atira kobo kop ame laro joo

⁷Ŋat arac ka oreto, agikki mere nwoŋo doŋ ennono, ento jo me ot a ŋat a kite atira pwod medde cuŋ.

⁸Jo kobo kop aber i kom dano kun lubo kite ame ŋeccere tye kede, ento ŋat ame tammere ogom jo cao acaa.

⁹Dano ame mwol, ame tio tic atek me nwoŋo gin me konyo kwo mere, ber kato at ame poro tyene i jo adoŋo kun tammere pe.

¹⁰Ŋat a kite atira gwoko lee mere epito paco aber, ento jo a kitegi reco wuno leyigi aboŋo kica.

¹¹Apur atek nwoŋo cam abup, ento ŋat ame balo kare mere i gin ame konyere pe, wie mom tio.

¹²Ŋat arac poto pi timo gin arac, ento ŋat a kite atira cuŋ i kiŋ aboŋo leŋere.

¹³Ŋat arac moko kene i kop ame en kobo, ento ŋat a kite atira bwot i ayela ame poto i kome.

¹⁴Dano yeŋ i gin aber pi kop oya i doge, gin ame dano tio lokere dok konye.

¹⁵Ŋat amiŋ neno gin etimo luŋ ni beco, ento ŋat aryek winyo tam a jo ocele.

¹⁶Ŋat amiŋ ka akemo omako ŋeye oyotoyot, ento ŋat aryek mom paro pi ayet ame oyete kede.

¹⁷Ŋat ame kobo kop ateni tito gin otimere ikokome, ento acaden agoba kobo kop me goba keken.

¹⁸Ŋat a niaŋŋere nok kobo koppogo aboŋo tamo, ame lit calo pala bat ame ocobo dano, cite kop ame ŋat aryek kobo caŋo dano acaŋa.

¹⁹Kop goba mom ri kare alac, ento kop ateni ri nakanaka.

²⁰Jo ame yiko kop me timo gin arac cunygi opoŋ i kop goba, ento jo ame tye kede yik me timo gin aber cunygi yom.

²¹Gin arac mom poto i kom ŋat a kite atira, ento ŋat arac bedo i lwak ayela meicel.

²²Rwot dag jo ame kobo kop me goba, ento cunye yom i kom jo ame ogen i ticgi.

²³Ŋat aryek kano kop ame en ŋeo, ento amiŋo bedo yabo miŋo mere baŋ jo ocele.

²⁴Ŋat ame tio tic atek doko aloc, ento caro mio dano doko opii.

²⁵Par okato kare geno dano bedo yomcuny, ento kop ame okobo kede kica kweo cunye.

²⁶Ŋat a kite atira leŋŋsi i gin arac yo, ento ŋat a kite rac, kite-nono rwenye arwenya.

²⁷Awackom mom nwoŋo gin emito, ento ŋat ame tio tic atek nwoŋo lim arome.

²⁸Kite atira obedo yo ame tero dano i kwo, ento miŋo obedo yo ame tero dano i to.